Kampioni i Kosovës në futboll, Ballkani e ka fituar ndeshjen e parë ndaj Santa Colomas në kuadër të raundit të parë kualifikues të Ligës së Kampionëve.
Në duelin e luajtur të martën mbrëma në Andorrë, Ballkani triumfoi 2:1 me rikthim të rezultatit dhe është në përparësi për ndeshjen e kthimit që e luan në Kosovë.
Në fakt, Ballkani arriti fitore të vështirë pasi Santa Coloma e para kaloi në epërsi. Në minutën e 22-të, rezultati i ndeshjes u zhbllokua kur El Ghzaou Darir shënoi dhe topi u devijua për të përfunduar prapa shpinës së portierit Enea Koliqi.
Megjithatë, pa përfunduar pjesa e parë, saktësisht në minutën e 42-të, Ballkani barazoi shifrat. Mesfushori Lindon Emërllahu shënoi nga penalltia për ta dërguar Ballkanin në pushim me rezultatin 1:1.
Fitoren Ballkanit ia siguroi sulmuesi Bernard Karrica në minutën 90-të me një gjuajtje të fortë nga zona.
Ndeshja e kthimit mes Ballkanit dhe Santa Colomas do të luhet javën e ardhshme në stadiumin “Zahir Pajaziti” në Podujevë.
Në rast se Ballkani e kalon këtë raund, atëherë do të jetë hera e parë për ekipin nga Suhareka që avancon në raundin e dytë të Championsit.
Me kualifikim në raundin e dytë të Championsit, Ballkani e ka siguruar pjesëmarrjen në play-offin e Ligës së Konferencës.
