Kampioni në fuqi i Kosovës në futboll, Ballkani, është kthyer të premten në stërvitje. Stërvitjen e ekipit suharekas e ka udhëhequr trajneri Ilir Daja, ndërsa lojtarët i kanë përshëndetur drejtuesit e klubit, duke përfshirë presidentin Arsim Kabashi.
Ballkani e ka përfunduar stinorin vjeshtor në pozitën e parë me 40 pikë. Llapi e Drita i kanë nga 34 pikë. Në fakt suharekasit kishin epërsi më të madhe për kohë të gjatë, por patën krizë rezultatesh në xhirot e fundit dhe Llapi e Drita u afruan me pikë.
Megjithatë Ballkani është favorit i madh në garën për titull të kampionit. Por titulli është vetëm një prej tri synimeve të Ballkanit për pjesën e dytë të kampionatit.
“Stërvitjet nisën sot me përkushtimin maksimal, ku të gjithë jemi me motivin më të lartë të mundshëm drejt synimeve tona të qarta, duke filluar nga Superkupa, e cila zhvillohet këtë muaj, Kupa e Kosovës sikukrse edhe objektivi kryesor – titulli i tretë kampion. Na pret një pranverë e nxehtë, ku së bashku me ju urojmë dhe mbi të gjitha besojmë t’ia dalim”, ka shkruar Ballkani.
Ballkani ka fituar titullin në dy vitet e kaluara dhe tani synon titullin e tretë rresht. Pritet të ketë largime këtë muaj nga Ballkani. Lumbardh Dellova është njëri prej lojtarëve që pritet të transferohet në ndonjë vend tjetër, ndërsa lëvizje mund të ketë edhe nga lojtarë të tjerë. Por priten edhe ardhje të reja, në raste se realizohen transferimet e lojtarëve aktualë të Ballkanit.
Të premten stërvitjet i ka nisur edhe Llapi e po ashtu disa skuadra të tjera.
Stinori pranveror në Superligë fillon më 10 shkurt. Më 4 shkurt zhvillohen ndeshjet e 1/8 së finales së Kupës së Kosovës. Ndërkohë më 20 janar në Antalya të Turqisë, Ballkani e Prishtina luajnë ndeshjen për Superkupën e Kosovës.
