Kryetarja e Unionit Socialdemokrat (SDU), Duda Balje është takuar me kryeministrin në detyrë, Albin Kurti, për të diskutuar rreth formimit të qeverisë së re.
Balje tha se Kurtit ia ka prezantuar kushtet e saj në këmbim të votës dhe tha se nuk ka marrë konfirmimin nga Kurti nëse ato do të plotësohen dhe se rrjedhimisht as nuk ka dhënë konfirmim për votimin e qeverisë.
“Sot ne kemi pas takimin e parë. Unë dola para kryeministrit me kërkesat që ne si boshnjakë kemi. Nuk kemi marrë asnjë konfirmim dhe nuk kemi dhënë asnjë konfirmim. Tash për tash jemi në fazën e bisedimeve”.
Tutje, ajo ka thënë se nëse ftohen do të takohen edhe me partitë opozitare.
“Ne do t’i vazhdojmë takimet, nëse ftohemi do të takohemi edhe me partitë opozitare”, ka deklaruar ajo.
Kurti gjatë ditës së djeshme ka nisur konsultimet me pakicat për formimin e qeverisë së re. Votat pro ia kanë konfirmuar Emilija Rexhepi, Nenad Rashiq dhe Elbert Krasniqi.
