Deputetja e Lidhjes Demokratike të Kosovës, Hykmete Bajrami, ka reaguar pas miratimit të Ligjit për Pagën Minimale, duke thënë se për këtë vendim Lëvizja Vetëvendosje ishte koordinuar më parë me ish-deputetin e Listës Serbe, Slavko Simiq dhe me Milan Radojiçiqin i cili është në kërkim nga organet e drejtësisë.
Nëpërmjet një postimi në Facebook, Bajrami ka thënë se edhe pse paga minimale tani e tutje është 264 euro, pensioni i veteranëve mbetet 170 euro.
“Efekti i #AferësZdravo, veteranët mbesin pa rritje të pensionit. Pas krejt asaj që ndodhi sot në Kuvend Vetëvendosje sapo e kaloj Ligjin për Pagën Minimale, Ligj për të cilin më herët ishin koordinuar me Radoicicin dhe Simicin. I përjashtuan veteranët e UÇK-së. Tash e tutje paga minimale është 264 euro e pensioni i veteranit mbetet VEÇ 170 euro. Çka pritet tjetër prej një qeverie ku ministri i financave i ka quajtur mercenarë ushtarët e UÇK-së e Mimoza Kusari në #AferënZdravo bënë pazare me Srpskan për veteranët. Ky popull nuk ju duron. Ky popull do t’ju ndëshkojë”, ka shkruar ajo.
Me 60 vota për e një abstenim është miratuar Ligji për pagën minimale. Ky ligj parasheh që paga minimale të bëhet 264 euro. Në votim nuk është mbështetur asnjë amendament.
