Deputeti i LVV-së, Alban Bajrami ka deklaruar se Qeveria Kurti nuk pranon Asociacion me kompetenca ekzekutive.
Bajrami duke u zotuar se diçka e tillë nuk do të bëhet, ka thënë se në të kaluarën rezistenca në raport me këtë gjë, ka qenë më e vogël.
Madje ai ka vlerësuar se opozita po e dëmton strategjinë negociuese të Kosovës në tavolinën e bisedimeve me Serbinë.
“Në shumicën e kohës në Kosovë opozita dëmtojnë edhe strategjinë negociuese në tavolinë me Serbinë. Nuk do të ketë Zajednicë. Asociacion me kompetenca ekzekutive të ashtuquajtur Zajednicë nuk do të ketë. Këtë ua sigurojë të gjithë qytetarëve. Në të kaluarën rezistenca ka qenë e vogël në raport me këtë. E ka cekur kryeministri Kurti që marrëveshja për asociacionin është e ndërlidhur. Ne e kemi bërë të qartë që marrëveshja për Asociacionin sikurse në marrëveshjen bazë të Brukselit por edhe në aneksin e Ohrit nuk është në krye të gjase, nuk është në krye të listës”, është shprehur ai në emisionin “Info Nata” në Tëvë 1.
Më tej, Bajrami ka thënë se, kryeministri aktual, Albin Kurti këtë pozitë do ta ketë edhe për një mandat dhe një Asociacion me kompetenca ekzekutive nuk do të ndodhë as atëherë.
“Deri më tani asociacioni është bërë shumë herë po t’i kishim dëgjuar diskutimet publike, por edhe në Kuvend. Po nuk po ndodhë dhe nuk do të ndodhë. Do ta shihni edhe në mandatin e ardhshëm prapë do të jetë kryeministër Albin Kurti dhe prapë nuk do të ketë Asociacion me kompetenca ekzekutive”, ka shtuar ai.
