Bajrami ka thënë se kjo ngjarje po kalon pa shumë angazhim nga shteti, shkruan teve1.info
“Si nënë e dy vajzave ky lajm me ka tmerru dhe prej momentit që e kam dëgju nuk mendoj asgjë tjetër. Për çudi, kjo ngjarje po kalon pa shumë vëmendje, pa shumë angazhim të shtetit, të institucioneve shtetërore. Ku është Ministri i Brendshëm? Ku është Policia e Kosovës? Ku është Prokuroria e Shtetit? Ku është Agjencia Kosovare e Intelegjencës? Ku është Forca e Sigurisë së Kosovës?”, ka shkruar ajo në një postim në Facebook.
Sipas saj, ministri i Brendshëm, Kryeprokurori i Shtetit, Drejtori i Policisë bashkë me Shefin e AKI-së e edhe me Komandantin e FSK-së do të duhej të mbanin konferenca të përditshme për të treguar se çka po bëjnë institucionet për rastin.
“Kjo është ngjarje e dhimbshme. Jam e sigurt se derisa vajzat të gjenden për familjet dhembja është me e rëndë se vdekja. Ju bëj thirrje të gjithëve kudo që jeni të kontribuoni në zbardhjen e rastit. Ndërsa, institucionet e shtetit, të gjitha bashkë edhe me mediat, të çohën në këmbë derisa të gjenden dy vajzat e zhdukura”, ka shtuar ajo.
Tash e një javë, dy familje po kërkojnë gjetjen e vajzave të tyre E.B., 19-vjeçare nga fshati Qyshk dhe L.N., 18-vjeçare nga Treboviçi i Pejës. Sipas raportimeve, vajzat kanë dalë nga shtëpitë e tyre dhe janë nisur për në Universitetin ”Kadri Zeka” në Pejë. /Teve1.info/