Ish-deputetja e LDK-së, Hykmete Bajrami, ka kritikuar Qeverinë në detyrë, duke thënë se emërimi i zëvendësministrave në një situatë kur qeveria është në dorëheqje përbën keqpërdorim të buxhetit të shtetit.
Sipas saj, në kushte të tilla ministrat kanë kompetenca të kufizuara dhe nuk veprojnë me kapacitet të plotë, ndërsa emërimet e reja nuk kanë asnjë nevojë urgjente institucionale.
“Qeveria është në dorëheqje. Kur një qeveri është në dorëheqje, ministrat kanë kompetenca të kufizuara dhe nuk punojnë me kapacitet të plotë. E pikërisht në këtë situatë Kurti po emëron zëvendësministra. Për çka? Jo për punë, sepse s’ka punë, as s’ka ndonjë nevojë urgjente, po i emëron që të marrin pagë nga buxheti i shtetit, pa bërë asgjë. Kjo është zhvatje e buxhetit – është abuzim me pozitën zyrtare. Dhe dëmi nuk është vetëm te paratë që po shpenzohen sot. Dëmi është te standardi që LVV-ja ka vendosë: me trajtu shtetin si pronë partiake, si mjet për me i shpërbly militantët. Këto standarde të ulëta kanë me i kushtu shumë e gjatë këtij vendi. Është koha të shkoni në opozitë se e keni grryer shtetin”, ka deklaruar Bajrami./teve1.info/
