Deputetja e rizgjedhur e LDK-së, Hykmete Bajrami ka kërkuar anulimin e testit të maturës shtetërore, duke thënë se procesi ka humbur besueshmërinë dhe nuk po e vlerëson dijen reale të nxënësve.
Ajo ka kritikuar mënyrën e organizimit të provimit, duke deklaruar se prej vitesh po përsëritet e njëjta situatë me publikimin e testit menjëherë pas fillimit të provimit, gjë që sipas saj e ka kthyer procesin në favor të kopjimit.
“Nëse nuk ke mundësi me organizu si duhet, anuloje. Testi i maturës nuk po e shpërblen dijen, por po e favorizon kopjimin,” ka deklaruar Bajrami.
Sipas saj, kjo situatë është e padrejtë ndaj nxënësve të cilët përgatiten me vite dhe me ndershmëri, ndërsa thekson se më të suksesshëm po dalin ata që arrijnë të kopjojnë gjatë provimit.
Ajo ka shtuar se problemi nuk është vetëm teknik, por prek edhe drejtësinë në arsim dhe procesin e regjistrimit në universitete, duke propozuar që vlerësimi të bazohet në suksesin e arritur gjatë shkollimit.
Në reagimin e saj, Bajrami i është drejtuar edhe Ministrisë së Arsimit, duke kërkuar marrjen e përgjegjësisë për situatën./teve1.info/
