Deputetja e Lidhjes Demokratike të Kosovës, Hykmete Bajrami, ka reaguar ndaj deklarimeve të ministres së Drejtësisë në detyrë Albulena Haxhiu rreth vendimit të Kushtetueses për konstituimin e legjislaturës së nëntë.
Në një postim në Facebook, Bajrami ka theksuar se ministrja Haxhiu gjatë qëndrimit të saj në detyrë nuk mbahet mend për asnjë reformë në fushën e drejtësisë me përjashtim të sulmeve ndaj gjykatave.
“As Vjosa Osmanit, as LVV-së nuk iu ka penguar përbërja e Gjykatës Kushtetuese kur kjo Gjykatë ka rrëzuar qeverinë në vitin 2020, asnjë zë, asnjë fjalë në atë kohë. Sulmet që ju bëni gjykatave tregojnë më shumë për ju sesa për gjykatat. Po i bëni gati pesë vjet në krye të Ministrisë së Drejtësisë dhe, përpos sulmeve ndaj gjykatave, asnjë punë, asnjë reformë s’ta mban kush mend.”
Bajrami ka rikujtuar se pas sulmit terrorist në Banjskë, kryeterroristit serb Milan Radojçiq iu krijua një korridor dhe ai iku në pikë të ditës nën vëzhgimin e kamerave dhe deri më sot asnjë qeveria e Vetëvendosjes nuk ka dhënë asnjë shpjegim.
“Qeveria e LVV-së pas sulmit terrorist në Banjskë ka pasur mundësi që ta shpallë organizatë terroriste Listën Serbe, por nuk e ka bërë një gjë të tillë dhe sot provoni të shisni patriotizëm dhe, sa herë që ndonjë vendim i ndonjë institucioni nuk ju pëlqen, disi tentoni ta lidhni me Serbinë dhe Radojçiq. Mos se po ju njohim! Po shihet sheshazi se ju LVV dhe Vjosa Osmani po e doni Gjykatën Kushtetuese pa kuorum. Veç na tregoni pse? Se kjo veç Kosovës nuk i shkon për shtati.”
Bajrami ka pyetur Haxhiu pas vendimit Kushtetueses se “kujt po i shet përralla” duke rikujtuar se votimi i fshehtë 48 herë është refuzuar nga shumica e deputetëve të Kuvendit, teksa vetë Haxhiu nuk ka marrë votat 6 herë në votim të hapur.
“Vota jonë kundër komisionit për votim të fshehtë ka qenë votë kundër komisionit, votë kundër votimit të fshehtë dhe votë kundër jush për kryetare të Kuvendit”, ka përfunduar ajo.
