Një 31-vjeçar ka mbetur i vdekur pasi që ra nga kati i tretë i një objekti në ndërtim e sipër të enjten në Vushtrri.
Për këtë, eksperti i sigurisë dhe shëndetit në punë, Naim Bajraktari ka kritikuar institucionet dhe punëdhënësit për mungesën e rezultateve konkrete në garantimin e sigurisë së punëtorëve, duke theksuar se mungesa e sanksioneve po ndikon në përsëritjen e rasteve tragjike në vendet e punës në Kosovë.
Në emisionin “Ditari” në Tëvë1, ai tha se pavarësisht aksioneve të zhvilluara për një muaj radhazi, nuk është bërë e ditur se çfarë masash janë ndërmarrë dhe kush është ndëshkuar.
“Me gjithë atë aksion që patëm për një muaj radhazi, të paktën nuk patëm asnjë rezultat se çfarë ndodhi, çfarë sanksionesh janë marrë. Prapë kemi ardhur në një pozicion se kujt t’ia lëmë fajin. Fajtori është pikërisht te punëdhënësi dhe shteti, te gjyqësia që nuk merr masa dhe nuk dënohet askush. Vërtet kjo është e mjerueshme”, deklaroi ai.
Sipas Bajraktarit, zbatimi i sanksioneve është mënyra e vetme për të ndryshuar qasjen e punëdhënësve ndaj sigurisë në punë.
“E vetmja gjë është sanksioni. Sanksioni i sjell të gjitha me vete. Punëdhënësi sillet në mënyrë të pakujdesshme ndaj punëtorëve. Ne vazhdimisht themi se investimi dhe sigurimi në punë nuk është shpenzim, por investim për ta rritur kualitetin e jetës së punëtorëve dhe produktivitetin e punës”, tha ai./teve1.info/
