Avokati Adrian Bajraktari ka folur në emisionin “Këndi i debatit” në Tëvë1 lidhur me mundësinë që rinumërimi i votave të ndikojë në afatet kushtetuese për zgjedhjen e presidentit të vendit.
Sipas Bajraktarit, ekzistojnë interpretime të ndryshme sa i përket tejkalimit të afateve kushtetuese, duke iu referuar nenit 86, paragrafi 2 të Kushtetutës.
Ai theksoi se Kushtetuta është e qartë se, në rast se presidenti nuk zgjidhet brenda afatit prej 60 ditësh nga fillimi i procedurës, dhe jo më vonë se 30 ditë para përfundimit të mandatit të presidentit aktual, vendi shkon në zgjedhje të reja.
“Ka interpretime të ndryshme sa i përket tejkalimit të afatit. Neni 86, paragrafi i dytë, përcakton në mënyrë eksplicite se vendi shkon në zgjedhje në rast se presidenti nuk zgjidhet brenda periudhës 60-ditore nga momenti i fillimit të procedurës, dhe jo më vonë se 30 ditë para përfundimit të mandatit. Shpresoj që të ketë reflektim nga subjektet politike dhe të mos shkojmë sërish në zgjedhje,” ka deklaruar Bajraktari.
