Eksperti i sigurisë dhe shëndetit në punë, Naim Bajraktari, ka deklaruar se gjatë javëve të fundit janë realizuar mbi 300 inspektime në vendpunishte në Kosovë, ndërsa në 126 raste është marrë vendim për ndërprerje të punimeve për shkak të mungesës së kushteve të sigurisë për punëtorët.
Në emisionin “Ditari” në Tëvë1, ai tha se kontrollet kanë nxjerrë në pah shumë parregullsi në sektorin e ndërtimit dhe në vende të tjera pune, duke theksuar se masat kanë qenë të nevojshme për mbrojtjen e punëtorëve.
“Mbi 300 inspektime janë bërë, nga këto inspektime 126 inspektime janë ndaluar punimet aty dhe kjo tregon që ka qenë një kohë e fundit për marrjen e këtyre masave, kemi qenë të informuar gjatë gjithë këtyre dy javëve, cdo dy ditë kemi pasur nga një informacion me vizita që janë bërë inspektimet dhe këtu e pamë ne qytetarët, e panë edhe vet inspektorati, por edhe vetë punëdhënësit sepse shumë parregullësi janë në vendpunishtet tona kudo nëpër Kosovë, do të thotë shumë e qëlluar kjo, por pak e tepëruar me masat që i kemi… cdo e dyta vendpunishte është ndërprerë, kjo nuk është ndërprerë për pagesa të rrogave, vetëm për sigurinë e punëtorëve në vendet e tyre të punës”, tha Bajraktari në emisionin “Ditari” në Tëvë1./teve1.info/
