Deputeti i Lëvizjes Vetëvendosje, Mefail Bajqinovci, ka komentuar raportimet se presidentja e Kosovës, Justina Shiroka-Pula, pritet ta kthejë nesër në Kuvend Ligjin për Dhomat e Specializuara.
Në emisionin “Këndi i Debatit” në Tëv1, Bajqinovci ka thënë se nuk ka informacion të konfirmuar lidhur me këtë mundësi, por ka deklaruar se, bazuar në disa deklarata të zyrtarëve të afërt me Partinë Demokratike të Kosovës (PDK), ka krijuar përshtypjen se ligji mund të kthehet në Kuvend.
Ai ka përmendur shqetësimet e ngritura lidhur me përmbajtjen e ligjit, duke theksuar se Lëvizja Vetëvendosje është e gatshme të bashkëpunojë, pavarësisht zhvillimeve të mundshme.
“Unë nuk e di se çfarë do të ndodhë, por bazuar në disa deklarata të zyrtarëve të ndryshëm të afërt me PDK-në, sot kam krijuar përshtypjen se ekziston mundësia që ligji të kthehet, pasi ka shqetësime se mund të ketë defekte. Nuk e di se si do të veprojë presidentja, por ne jemi të gatshëm të bashkëpunojmë. E kemi thënë edhe më herët se ka pasur shumë nguti dhe sulme ndaj nesh, por, pavarësisht se si do të rrjedhin gjërat, ne jemi të gatshëm të bashkëpunojmë. Do t’i shkojmë deri në fund dhe do t’i qëndrojmë prapa këtij procesi, përkundër faktit se mund të ketë pasoja ndërkombëtare për Kosovën”, ka deklaruar Bajqinovci.
Ndryshe, Kuvendi i Kosovës i miratoi më 6 tetor ndryshimet në Ligjin për Dhomat e Specializuara dhe Zyrën e Prokurorit të Specializuar, pasi katër ish-krerë të Ushtrisë Çlirimtare të Kosovës u dënuan më 16 shtator me gjithsej 81 vjet burgim për krime lufte.
Megjithatë, votimi në Kuvend nuk shënoi përfundimin e procesit.
Brenda tetë ditësh nga data e miratimit në Kuvend, ligji duhet të nënshkruhet dhe të shpallet nga presidentja e Kosovës, Justina Shiroka-Pula.
Nëse presidentja nuk vepron brenda këtij afati, ligji konsiderohet i shpallur dhe publikohet në Gazetën Zyrtare.
Së fundmi, janë shtuar zërat se Ligji për Specialen mund të kontestohet edhe para Gjykatës Kushtetuese të Dhomave të Specializuara.
Sipas Kushtetutës së Kosovës, presidentja mund ta kthejë ligjin në Kuvend për rishqyrtim, nëse vlerëson se ai është i dëmshëm për interesat legjitime të Republikës së Kosovës.
Sipas nenit 84 të Kushtetutës, këtë të drejtë presidentja mund ta shfrytëzojë vetëm një herë për të njëjtin ligj.
“Ka të drejtën e kthimit për rishqyrtim të ligjeve të miratuara, nëse konsideron se janë të dëmshme për interesat legjitime të Republikës së Kosovës ose të një a më shumë komuniteteve të saj. Të drejtën e rikthimit të një ligji mund ta shfrytëzojë vetëm një herë”, thuhet në pikën 6 të nenit 84.
Nëse Kuvendi e miraton sërish të njëjtin ligj, me shumicën e votave të numrit të përgjithshëm të deputetëve, sipas rregullave kushtetuese, ligji konsiderohet i miratuar dhe shpallet nga presidentja.
Kryetarja e Kuvendit të Kosovës, Albulena Haxhiu, e ka nënshkruar më 15 tetor Ligjin nr. 11/L-001 për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, i njohur si Ligji për Gjykatën Speciale.
Pas nënshkrimit nga kryeparlamentarja, dokumenti i është përcjellë menjëherë presidentes së Kosovës, Justina Shiroka-Pula, për dekretim dhe shpallje.
Presidentes Justina Shiroka-Pula i kanë mbetur edhe dy ditë për ta nënshkruar ose për ta kthyer ligjin në Kuvend për rishqyrtim./teve1.info/
