Rrjeti i Organizatave Joqeveritare AVONET ka bërë të ditur se do të organizojë një performancë simbolike në nderim të 27-vjeçarit, i cili humbi jetën në rrethana të dyshimta, ngjarje që ka tronditur opinionin publik dhe ka ngritur shqetësime mbi përgjegjësinë institucionale dhe shkeljet e mundshme të të drejtave të njeriut.
Sipas njoftimit të AVONET-it, qëllimi i kësaj performancë është të theksohet nevoja për kërkimin e përgjegjësisë, hetim të plotë dhe transparent të rastit, si dhe kërkesa për drejtësi të paanshme dhe të pandikuar.
Aktiviteti do të mbahet më 9 korrik 2025, duke filluar nga ora 10:30, pranë Stacionit të Policisë në Lipjan. Organizata thekson se ky aktivitet ka për qëllim të shërbejë si një thirrje qytetare për llogaridhënie dhe mbrojtje të dinjitetit njerëzor.
AVONET ka ftuar përfaqësuesit e mediave që ta përcjellin nga afër këtë aktivitet, duke kontribuar në informimin e drejtë të opinionit publik dhe forcimin e zërit qytetar për drejtësi.
