Rrjeti i OJQ-ve AVONET ka dorëzuar një kërkesë për inicimin e procedurës disiplinore ndaj Florije Kqiku, udhëheqëse e Inspektoratit të Ndërtimit në Ministrinë e Mjedisit, Planifikimit Hapësinor dhe Infrastrukturës.
Në një njoftim për media është thënë se kjo kërkesë vjen si rezultat i shkeljeve “të rënda” dhe të përsëritura të detyrave zyrtare nga ana Kqiku, të cilat kanë ndikuar negativisht në funksionimin e rregullt institucional dhe kanë dëmtuar transparencën dhe llogaridhënien publike.
“Për shkak të mosveprimit dhe sjelljeve joprofesionale të saj, shoqëria civile kanë hasur në pengesa për të marrë informacion të drejtë dhe të plotë mbi çështjet e ndërtimit dhe zbatimit të ligjit”, thuhet në njoftim.
“AVONET ka ndërmarrë këtë hap pas një periudhe të gjatë shqetësimesh dhe pas analizimit të veprimeve që tregojnë një mungesë serioze të përkushtimit profesional dhe përgjegjësisë institucionale. Konkretisht, znj. Kqiku ka treguar neglizhencë të vazhdueshme ndaj kërkesave zyrtare të AVONET, duke mos ofruar përgjigje profesionale dhe duke mos respektuar afatet e përcaktuara ligjore. Një qasje e tillë pengon proceset e monitorimit dhe e bën të pamundur informimin e saktë të publikut mbi zbatimin e ligjit në fushën ndërtimit”, thuhet mes tjerash në njoftim.
Ndërkohë, thuhet se AVONET ka identifikuar Kqikun se ka dhënë informacione të pavërteta, duke pretenduar ekzistencën e një padie kundër Ministrisë.
“Ky informacion është konstatuar si i pavërtetë nga Gjykata Themelore në Prishtinë. Deklaratat e rreme dhe të pabaza dëmtojnë besimin e qytetarëve dhe krijojnë pasiguri mbi veprimtarinë institucionale. Veprime të tilla dëmtojnë llogaridhënien institucionale dhe krijojnë një frymë të mosbesimit ndaj institucioneve që priten të jenë të hapura dhe transparente”.
AVONET ka kërkuar që Komisioni Disiplinor i Ministrisë së Mjedisit të trajtojë këtë rast me profesionalizëm dhe paanshmëri.
