Sipas një komunikate për medie, Avonet mbetet e shokuar me neglizhencën e institucioneve, ku vetëm gjatë këtij viti janë vrarë pesë gra të cilat kishin alarmuar të gjitha institucionet relevante për dhunën psikike dhe fizike që po ndodhte ndaj tyre.
“Duke përcjellur me shqetësim të thellë këtë ngjarje tragjike, AVONET mbetet i shokuar me neglizhencën e institucioneve, ku vetëm gjatë këtij viti kemi pesë gra të vrara, të cilat tashmë kishin alarmuar të gjitha institucionet relevante për dhunën psikike dhe fizike që po ndodhte ndaj tyre”, thuhet në komunikatë.
Sipas njoftimit, lidhur me rastin në fjalë, Gjykata Themelore e Ferizajt ka lëshuar Aktvendimin për urdhër mbrojtje, me datë 13.09.2022, me kërkesë nga Zyra për Mbrojtjen e Viktimave, që funksion në kuadër të Prokurorisë së Shtetit, i cili ishte në fuqi deri në muajin mars 2023, dhe Gjykata Themelore e Ferizajt të njëjtin e kanë dënuar me gjobë për armëmbajtje pa leje, me
ç’rast Prokuroria Themelore e Ferizajt ka ngritur aktakuzë ndaj S.H për veprën penale kanosje.
“Duke qenë në dijeni Gjykata Themelore e Ferizajt se i njëjti ishte recidivist i veprave penale, gjykatësi, ka neglizhuar dhe ka vënë në rrezik jetën e tashmë viktimës, duke marr parasysh se ky gjykatës të njëjtin e ka dënuar me dënim me gjobë për armëmbajtje pa leje, duke pasur parasysh rrethanat dhe dashjen e kryesit të veprës penale”, thuhet në njoftim.
Sipas komunikatës, Gjykata Themelore e Ferizajt ka treguar mungesë profesionalizmi çka bëri që S.H të kryente veprën penale të vrasjes me paramendim, duke pasur mundësi që të endet i lirë përkundër denoncimeve të vazhdueshme nga e ndjera.
“Në këtë rast ka dështuar edhe Policia e Kosovës, e cila është përgjegjëse për sigurinë e viktimave të dhunës në familje dhe zbatimin të urdhrave për mbrojtje. Po ashtu, Institucionet e
Republikës së Kosovës deri më tani nuk kanë marrë asnjë veprim për mbështetjen e Qendrave për Punë Sociale, si në aspektin logjistik dhe profesional, shumica e QPS-së nuk kanë automjete të tyre dhe mungesë stafi e hapësirave dhe fondeve emergjente”, thuhet në komunikatë.
Avonet kërkon nga Këshilli Gjyqësor i Kosovës që të merr masa urgjente ndaj Gjykatës Themelore të Ferizajt dhe gjykatësit të çështjes për neglizhencë, mosprofesionalizëm dhe mos efikasitet.
