Departamenti për Krime të Rënda ka miratuar kërkesën e mbrojtjes së të akuzuarit Naim Murseli për realizimin e një ekzaminimi psikiatrik ndaj tij.
Sipas konfirmimit zyrtar nga gjykata për Tëvë1, më 4 qershor 2025 është aprovuar kërkesa e parashtruar nga avokatja e Murselit, ndërsa më 9 qershor trupi gjykues ka lëshuar urdhëresë që Instituti i Psikiatrisë Forenzike në Prishtinë të kryejë ekzaminimin e gjendjes mendore të të akuzuarit.
E për këtë, avokatja e Naim Murselit, Teuta Zhinpotoku ka thënë për tëvë1, se pasi Murseli është transferuar në Institutin e Psikiatrisë ka ndodhur si rezultat i kërkesës së paraqitur nga mbrojtja për vlerësimin e gjendjes së tij mendore.
Avokatja ka thënë se nuk është e njoftuar për një zhvillim të tillë, dhe nuk ka informacion për kohëzgjatjen e qëndrimit të Naim Murselit në Institutin e Psikiatrisë.
“Nëse z. Naim Murseli është transferuar në Institutin e Psikiatrisë apo në Klinikën e Neurologjisë, kjo do të ketë ndodhur si rezultat i kërkesës së paraqitur nga mbrojtja për vlerësimin e gjendjes së tij mendore dhe vetëm me aprovimin e Gjykatës. Deri më tani, unë nuk jam zyrtarisht e njoftuar për një zhvillim të tillë, por çdo veprim i tillë do të duhej të ishte në kuadër të procedurës ligjore. Aktualisht nuk ka ndonjë informacion zyrtar për kohëzgjatjen e qëndrimit të z. Naim Murseli në Institutin e Psikiatrisë, nëse ai është realisht i shtruar atje. Zakonisht, në raste kur Gjykata urdhëron ekspertizë psikiatrike, qëndrimi mund të zgjasë disa ditë deri në disa javë, në varësi të kompleksitetit të vlerësimit dhe rekomandimeve të profesionistëve shëndetësorë. Kohëzgjatja përcaktohet nga nevoja për vlerësim të plotë dhe vendimi final i mjekëve”, ka deklaruar ajo./teve1.info/
