Avokati Yll Zekaj, i ftuar në emisionin “Ditari” në Televizionin Tëvë1, ka folur për rastin e vrasjes trefishtë në Gjilan dhe masat që duhen marrë ndaj përsëritësve të veprave penale. Ai ka theksuar se institucionet e drejtësisë, si prokuroria dhe gjykata, duhet të jenë shumë të kujdesshme kur caktojnë dënimet për personat që kanë kryer më parë vepra penale.
“Përsëritësit e veprave penale duhet ta kenë parasysh institucionet e drejtësisë, prokuroria por edhe gjykata, për të kaluarën e personave që bien ndesh me ligjin. Çdo rast ku përsëritësit e veprave penale duhet të trajtohet me kujdes, sidomos në matjen e lartësisë së dënimit, sepse kjo shërben si argument se i njëjti nuk është resocializuar dhe është kryerës i veprave penale,” ka thënë Zekaj.
Ai ka folur edhe për rastin konkret të Mefail Shkodrës, i cili u lirua me masën e dorëzanisë, duke e cilësuar këtë masë të papërshtatshme për një person me akuza të rënda.
“Duhet të jemi shumë të kujdesshëm kur bëhet fjalë për krime të rënda, sidomos në cakimin e dënimeve. Masa e dorëzanisë në këtë rast është e papërshtatshme, sepse i pandehuri mund të mos iu përgjigjet institucionit të drejtësisë, të përsërisë veprën penale ose të ndikojë në prishjen e provave. Në raste të tilla zakonisht kërkohet paraburgimi, ndërsa masa e dorëzanisë përdoret shumë rrallë,” ka shtuar avokati.
Ai gjithashtu ka theksuar se çdo gjyqtar që ka vendosur masa të tilla duhet të japë llogari brenda institucioneve të drejtësisë.
“Mendoj se çdo gjyqtar që ka kërkuar masa të tilla për dorëzani duhet të japë llogari brenda institucioneve të drejtësisë, sepse përgjegjësia është shumë e madhe, sidomos kur vendimet kanë pasoja serioze për sigurinë publike,” ka përfunduar Zekaj.
