“Vlerësojmë se punëdhënësi në rastin e mosrespektimit të kontratës së punës, nuk i ka respektuar dispozitat ligjore të parapara me Ligjin e Punës, marrëveshjet kolektive, por edhe në kundërshtim të plotë me konventat e Organizatës Ndërkombëtare të Punës si një vendim i paligjshëm. Kjo u vërtetua edhe me vendimin e Inspektoratit të Punës, me të cilin janë anuluar vendimet për mos vazhdimin e kontratës së punës të punëtorëve të aeroportit “Limak Kosova”. Fakti se njoftimi i punëdhënësit është joligjor, vërtetohet edhe me nenin 1 të kontratës së punës, të lidhur më mes të punëdhënësit dhe punëtorit, në të cilin përcaktohet se varësisht nga kushtet dhe rrethanat operacionale si dhe të performancës së punëtorit që është shumë më rëndësi, e në rastet të cilat i përfaqësoj unë dhe ato që kanë qenë në marrëdhënie pune tek punëdhënësi kanë performancë të shkëlqyeshme, si dhe ndaj tyre nuk është zhvilluar asnjë vërejtje gojore apo me shkrim ose ndonjë procedurë e brendshme disiplinore”, tha Sopi në emisionin “De Jure” në Tëvë1.
Pas marrjes së vendimit të shkallës së parë, menaxhmenti i Aeroportit Ndërkombëtar të Prishtinës “Adem Jashari”, ka ushtruar ankesë në Gjykatën e Apelit.
Avokati Sopi tha se presin që Gjykata e Apelit të vërtetojë aktgjykimin e shkallës së parë dhe punëtorët të kthehen në vendet e tyre të punës.
“Kemi bindjen e plotë dhe duke u bazuar në të gjitha ato shkelje të cilat i ka bërë punëdhënësi dhe i ka vërtetuar edhe Gjykata Themelore, dega në Lipjan, me të cilën është aprovuar kërkesëpadia e paditësve punëtorëve të aeroportit. Pa dyshim që presim që Gjykata e Apelit si shkallë e dytë të refuzojë ankesën e të paditurës si të pabazuar dhe të vërtetojë aktgjykimin e gjykatës së shkallës së parë”, shtoi ai.
Për më shumë, ndiqeni hulumtimin “Hakmarrja e Limak-ut ndaj punëtorëve”, i cili transmetohet në Tëvë1 dhe “Betimi për Drejtësi”./Tëvë1/
