Zyra e Prokurorit të Specializuar (ZPS) e ka dorëzuar një version publik të aktakuzës së ndryshuar në çështjen ndaj Hashim Thaçit, Kadri Veselit, Jakup Krasniqit dhe Rexhep Selimit, ku bëhen të ditur se janë mbi 100 persona që pretendohet se janë vrarë e zhdukur me forcë.
Dokumenti është deklasifikuar më 27 shkurt, ndërsa gjyqi ndaj Thaçit dhe të tjerëve do të fillojë më 3 prill.
Avokati serb Toma Fila ka thënë se duhen kushte të veçanta për gjykimin e Thaçit dhe të tjerëve.
“Kur Carla del Ponte ishte prokurore, ajo vazhdimisht thoshte se nuk kemi paraqitur prova kundër UÇK-së, se nuk kemi dhënë listën e komandantëve në atë kohë, dhe unë e di që Zoran MIjatoviqi është kreu i Udba-s, në urdhrin e Zoran Xhinigjiqit, ai e bëri këtë dhe mendoj se ne na kanë gënjyer. Vetëm me zbulimin e Dik Martit, ajo histori kthehet papritur. Gjëja më e rëndësishme tek ne është që nuk kemi aktakuzë për shtëpinë e verdhë. Nuk kemi asnjë aktakuzë ndaj Shqipërisë, e cila qëlloi mbi popullin tonë. Nuk kemi të mbijetuar! Kemi dëshmitarë se dikush është rrëmbyer dhe marrë dhe nuk është më aty! Kemi dëshmitarë që dikush është marrë me dhunë dhe nuk janë më, as kufomat e tyre” tha Fila për Tv Pink, përcjell teve1.info.
Sa i përket Thaçit ai tha se nuk pret dënim.
“Do ta gjykojnë atë bazuar në ligjet e Kosovës. Kam frikë se s’do të ketë asgjë nga ai gjykim”, deklaroi ai.
