Avokati, Skënder Musa i cilëson pamjet e sotme të përleshjes mes deputetëve si shumë të rënda.
Por ai bën të ditur se deputetët kanë imunitet dhe nuk mund të ndiqen penalisht, pasi përleshja ka ndodhur në objektin e Kuvendit.
“Me vetë faktin që ka ndodh rrahja në Kuvendin e Kosovës nuk mund të ndiqen penalisht anëtarët e Kuvendit, deputetët kanë imunitet për veprat penale të natyrave të lehta si rrahja dhe pjesëmarrja në rrahje. Asnjë deputet nuk mund të ndiqet penalisht. Është mirë që Prokuroria ka filluar hetimet me qëllim që të zbardhet se si filloi dhe si erdhi te rrahja, mirëpo deputetët kanë imunitet sa i përket këtyre lloj veprave të lehta mund të themi, siç ndodhi sot në Kuvendin e Kosovës. Ishte një rrahje që siç duket nuk pati as lëndime trupore, nuk di a ka kërkuar ndonjë deputet ndihmë mjekësore, mirëpo aq sa kuptova nuk pashë se pati të lënduar. E njëjta nuk vlen për anëtarët e Qeverisë. Anëtarët e Qeverisë nuk jam i sigurt se a kanë imunitet”, deklaroi ai në një lidhje direkte në “Ditari” në Tëvë 1.
Meqenëse deputetët janë imunë, sipas tij, as Prokuroria nuk mund të ngrit aktakuzë. Musa thekson se ajo se çfarë mund të bëjë Prokuroria është që të konstatojë se kush ka filluar sulmin i pari, kush është goditur dhe nga kush.
Avokati Musa tregoi edhe masat që mund të merren për anëtarët e Qeverisë dhe ato që mund të marrë Kuvendi për deputetët.
“Ajo çfarë mund të bëjë Prokuroria është konstatimi se kush e ka filluar i pari sulmin, kush kanë qenë të goditur dhe nga kush janë godit. Mirëpo edhe nëse ngritet aktakuzë, momentin që shkon në Gjykatë ajo aktakuzë hudhet poshtë, për shkak se deputetët janë të mbrojtur për një sërë veprash penale që janë të natyrave të lehta siç është rrahja apo pjesëmarrja në rrahje…nuk do të thotë që çdo përleshje fizike në mes të deputetëve dhe anëtarëve të Kuvendit të jetë vepër penale. Mund të ketë nga ana e Kuvendit masa të tjera, përjashtimi i deputetit të marrë pjesë në seancë për shtatë ditë, për 15 ditë, apo një muaj…por edhe për anëtarët e Qeverisë mund të ketë masa të tjera disiplinore nëse kanë vullnet politik”, u shpreh ai.
Në seancën e sotme të Kuvendit ka ndodhur një përleshje mes deputetëve të pozitës dhe opozitës, gjë që ka bërë që seanca të ndërpritet e të vazhdojë përsëri.
Përleshje ka pasur përsëri edhe në pjesën e dytë të seancës. /Teve1.info/
