Avokati Skënder Musa ka deklaruar se identifikimi i personave që kanë marrë pjesë drejtpërdrejt në vjedhjen e votave gjatë procesit të numërimit nuk paraqet vështirësi, pasi sipas tij ekzistojnë të dhëna të qarta për përgjegjësit në vendvotime.
Musa theksoi se procesi i votimit dhe numërimit është zhvilluar në salla të ndara sipas listave me emra dhe mbiemra të votuesve, ndërsa për çdo tavolinë numërimi dihet saktësisht se kush ka qenë i angazhuar.
“S’do të jetë e vështirë për ta ditur për njerëzit që kanë marrë pjesë drejtpërdrejtë në vjedhje gjatë numërimit të votave. Për shkak se sallat në ku është votuar kanë qenë me mbiemra të njerëzve që votojnë dhe në ato salla ku kanë qenë kutitë e votimit dihen kush ka qenë në tavolina e caktuar dhe nëse ka kaq shumë rrjedhje siç është vërtetuar në Prizrenit”, deklaroi ai në emisionin “Info Nata” në Tëvë1.
Ai shtoi se parregullsitë e zbuluara nuk duhet të konsiderohen si fenomen i izoluar vetëm në Prizren, duke shprehur bindjen se raste të ngjashme kanë ndodhur edhe në qendra të tjera të mëdha të vendit.
“Mendoj se nuk është vetëm Prizreni që ka vjedhur kaq shumë, por atje është zbuluar edhe në qendrat tjera si në Prishtinë e Mitrovicë besoj se numri ka qenë përafërsisht i njëjtë”, deklaroi ai. /teve1.info/
