Avokati Arbër Jashari ka reaguar lidhur me ngjarjen tragjike të ndodhur së fundmi në Gjykatën e Apelit në Tiranë, ku një gjyqtar u vra gjatë një seance gjyqësore, ndërsa tre të tjerë mbetën të plagosur. Ai komentoi rastin në emisionin “Ditari” në Tëvë1, duke e quajtur ngjarjen tepër të rëndë dhe shqetësuese për sistemin e drejtësisë.
“Fatkeqësisht është një lajm tejet i trishtë. Ajo që e bën edhe më të dhimbshëm është fakti që ai është vrarë në vendin e tij të punës, në një proces gjyqësor, nga një person që ka qenë subjekt i procedurës në një çështje juridiko-civile,” – tha Jashari.
Sipas tij, ky rast tregon qartë rreziqet me të cilat përballen përfaqësuesit e drejtësisë në Shqipëri dhe në rajon.
“Kjo tregon se sa i rrezikshëm është profesioni i gjyqtarit dhe sa e vështirë është të ndash drejtësi në Shqipëri. Gjendja nuk është shumë më ndryshe as në Kosovë, vetëm se nuk kemi pasur raste të kësaj natyre dhe përmasash. Uroj që të mos kemi kurrë,” – shtoi ai.
Avokati Jashari theksoi gjithashtu nevojën urgjente për masa shtesë sigurie në ambientet gjyqësore dhe rreth përfaqësuesve të drejtësisë, për të shmangur ngjarje të tilla të rënda.
“Ajo që dua të theksoj është se duhet të shtohet numri i trupave të sigurisë dhe masat mbrojtëse në gjykata, sepse nganjëherë, edhe nga pakujdesia ose neglizhenca, ndodhin situata të tilla tragjike,” – u shpreh më tej Jashari.
Ngjarja ka tronditur opinionin publik dhe ka hapur diskutime të shumta për sigurinë në institucionet e drejtësisë, jo vetëm në Shqipëri, por edhe në rajon.
