Përmes një deklarate publike në Ditën Ndërkombëtare për të Drejtat e Njeriut, Avokati i Popullit, Naim Qelaj, ka thënë se përkundër progresit të arritur në respektimin e të drejtave të njeriut, gjendja në Kosovë vazhdon të jetë pamjaftueshëm në përputhje me të drejtat dhe liritë themelore të përcaktuara në Kushtetutë dhe instrumente ndërkombëtare.
“Dhunës në familje, dhunës në baza gjinore, vrasjes së grave dhe rasteve të dhunimeve seksuale të vajzave të mitura; pozitës së gruas në shoqëri që vazhdon të jetë diskriminuese në raport me burrat; pabarazisë që është e shprehur në nivel tepër të ulët të pjesëmarrjes së grave në ndarjen e pasurisë dhe në trashëgimi, pjesëmarrjen e tyre në tregun e punës, në jetën politike dhe vendimmarrje dhe në sektor tjerë të jetës publike e private; pozitës së rëndë të personave me aftësi të kufizuar për shkak të pamundësisë së autoritetit publik për t’ju garantuar qasje fizike, etj.”, thuhet ndër të tjera në komunikatë.
Sipas Qelajt, shqetësuese vazhdon të mbetet cenimi i të drejtës për gjykim të drejtë dhe në kohë të arsyeshme për shkak të zvarritjes së procedurave, mungesës së një sistemi efektiv të mjeteve juridike gjyqësore, paqartësitë në interpretimin uniform të së drejtës, dhe mungesa e arsyetimit të duhur të vendimeve gjyqësore.
“Vazhdon të jetë shqetësim mos përmbushja e detyrimit për respektimin e të drejtave të fëmijëve, si: gjithpërfshirja në arsim të fëmijëve me aftësi të kufizuar, mbrojtja e fëmijëve nga punësimi para moshës së lejuar, mbrojtja e fëmijëve nga kërkimi i lëmoshës në rrugë, ruajtja e fëmijëve nga dhuna në familje, mungesa e integrimit të duhur social i tyre”, thuhet ndër të tjera në komunikatë.
Po ashtu Avokati i Popullit si shqetësim tjetër në Kosovë e ka theksuar edhe mungesën e kapaciteteve institucionale për mbikëqyrjen e sigurisë dhe shëndetit në punë, mungesën e përgjegjësisë institucionale për mos zbatimit të ligjit dhe mungesë e theksuar e llogaridhënies, etj.
“Avokati i Popullit kërkon nga autoritetet të përmbushin detyrimin dhe përgjegjësin që ka shteti për masat që duhet të merr për mbrojtjen e të drejtave dhe lirive të njeriut, si detyrime pozitive”, thuhet ndër të tjera në njoftim.
