Qelaj ka folur për rastin e Diana Kastratit, e cila u vra në pikë të ditës disa metra larg shtëpisë së saj nga ish-bashkëshorti, dhe rastin e Kujtim Veselit, i cili është dhunuar seksualisht dhe është gjetur i vdekur më 11 korrik, 2019, poshtë shkallëve të një objekti banimi në lagjen “Xhemajl Mustafa”, në Fushë Kosovë.
Sipas tij këto janë dy rastet fatale që kanë përfunduar proceset gjyqësore në Gjykatën Kushtetuese.
Qelaj ka thënë se në dy rastet Gjykata Kushtetuese ka gjetur se shteti ka dështuar në përmbushjen e detyrimeve që ka në raport me mbrojtjen e jetës me qytetarët e vet.
“Shteti nuk ka për obligim me i nxjerrë ligjet por ka për obligim në rastin kur nxjerrin ato ligje me i marrë krejt masat operative dhe administrative për me i zbatu ato ligje”, ka thënë ai.
Tutje Qelaj ka theksuar se kur shteti e garaton të drejtën për jetë, ka për obligim t’i marr masat që sigurojnë jetën.
“Kur shteti e garaton të drejtën për jetë ka për obligim me i marr edhe krejt masat me na siguru jetën, në kuptimin e aq sa është standard i mbrojtjes së qytetarit nga ana e shtetit”, ka thënë Qelaj në Tëvë1.
Qelaj ka thënë se për rastin e Kujtim Veslit institucioni i Avokatit të Populit ka dalë me një koment në lidhje me këtë rast.
Në “Këshilla Juridike” ka treguar se si mund të ndihmohen qytetarët nga institucioni i Avokatit të Popullit nëse i’u shkelën të drejtat e njeriut.
Ai ka thënë se në të gjithë territorin e Kosovës kanë 7 zyre, ku qytetarët e Kosovës mund të drejtohen për të kërkuar ndihmë nëse i’u shkelen të drejtat.
Përveç zyrave nëpër vende të ndryshme të Kosovës, Qelaj ka thënë se qytetarët mund të drejtohen edhe përmes telefonit, Facebookut, përmes faqes zyrtare të Avokatit të Popullit, përmes e-mail adresës.
