Fluturimi i kryeministrit izraelit, Benjamin Netanyahu për në SHBA anashkaloi hapësirën ajrore të shumicës së vendeve evropiane nga frika se mund të arrestohej në lidhje me një urdhër arresti të Gjykatës Ndërkombëtare Penale (ICC) për krime lufte në Gaza, thanë mediat lokale të enjten.
Sipas Amichai Stein, një korrespondent diplomatik për kanalin i24 News, avioni i Netanyahut shmangu hapësirën ajrore franceze, duke zgjatur udhëtimin drejt SHBA-së për shkak të urdhër-arrestit të GJND-së dhe tensioneve aktuale midis Tel Avivit dhe Parisit në lidhje me luftën në Gaza.
Aeroplani i tij nuk kaloi mbi asnjë vend evropian, përveç Greqisë dhe Italisë, tha korrespondenti, ndërsa ndau një hartë që zbulonte itinerarin e fluturimit të Netanyahut.
Në nëntor 2024, gjykata me seli në Hagë lëshoi urdhër-arreste për Netanyahun dhe ish-ministrin e Mbrojtjes Yoav Gallant me akuzat për krime lufte dhe krime kundër njerëzimit në Gaza.
Netanyahu u largua nga Tel Avivi herët të enjten për t’iu drejtuar Asamblesë së 80-të të Përgjithshme të OKB-së në Nju Jork dhe për t’u takuar me Presidentin e SHBA-së, Donald Trump në Shtëpinë e Bardhë të hënën.
Duke folur me gazetarët në aeroportin Ben Gurion të Tel Avivit para nisjes së tij, Netanyahu tha se do të dënojë udhëheqësit e vendeve që njohën shtetësinë palestineze, citon Anadolu.
Disa vende perëndimore, përfshirë Francën, Mbretërinë e Bashkuar, Kanadanë, Australinë dhe Belgjikën, e njohën shtetin e Palestinës këtë javë, duke e çuar numrin e përgjithshëm në 159 nga 193 shtetet anëtare të OKB-së.
Netanyahu tha se do të takohet me Trumpin për herë të katërt që kur presidenti amerikan mori detyrën në janar 2025, për të diskutuar “mundësitë e mëdha që kanë sjellë fitoret tona dhe nevojën tonë për të përmbushur objektivat e luftës”.
Udhëtimi i tij vjen ndërsa ushtria izraelite vazhdoi një ofensivë brutale në Gaza, duke vrarë më shumë se 65,400 palestinezë, shumica prej tyre gra dhe fëmijë, që nga tetori i vitit 2023.
