Mesfushori Leon Avdullahu është në listën provizore të Kombëtares së Zvicrës për ndeshjet me Kosovën e Slloveninë që luhen muajin tjetër në kuadër të kualifikimeve për Botërorin 2026.
Megjithatë, Avdullahu ende nuk ka marrë vendim se cilin shtet do ta përfaqësojë në nivelin ndërkombëtar, pasi ka kohë që po kërkohet edhe nga Kosova.
Dy federatat, ajo e Kosovës dhe Zvicrës janë në garë për Avdullahun, i cili në këtë afat kalimtar të verës u largua nga Baseli për t’u transferuar te skuadra e Hoffenheimit që bën gara në Bundesligë.
Muaj më parë, Avdullahu ishte takuar me kreun e FFK-së, Agim Ademi kurse së fundmi një takim të tillë e ka pasur edhe me kreun e federatës zvicerane, Peter Knabel.
Ky takim ka ardhur pas atij që mesfushori 21-vjeçar e kishte javë më parë me selektorin e Zvicrës, Murat Yakin, i cili i ka bërë me dije se llogarit në shërbimet e tij.
Në fakt, nëse Avdullahu vendos ta përfaqësoj Zvicrën, atëherë ai debutimin e tij do ta bëjë kundër Kosovës apo nëse zgjedhë “Dardanët”, atëherë do të debutojë kundër helvetikëve.
Avdullahu ende nuk ka marrë vendim, por si Kosova ashtu edhe Zvicra deri në javën e ardhshme duhet ti bëjnë publike listat për ndeshjet e shtatorit.
Zvicra dhe Kosova, do të përballen më 5 shtator në Basel në kuadër të Grupit B kualifikues për Kupën e Botës 2026.
