Ish-diplomati, Tomorr Avdia, është pajtuar me deklaratën e presidentes së vendit, Vjosa Osmani, ku thotë se veprimet e sotme të Policisë së Kosovës në veri ndaj bandave kriminale të presidentit të Serbisë, Aleksander Vuçiq, janë legjitime.
Avidia, në emisionin “Info Nata”, tha se deklarata e presidentes është korrekte.
“Sigurisht, deklarata është korrekte. Asnjë shtet në qoftë se quhet pak demokratik në protesta të tilla, nuk ka raste kur plagosen disa policë, thyhen disa automjete dhe asnjë nga protestuesit jo, janë të mbrojtur, të pagërvishtur, dhe quhet provokim ose dhunë”, tha ai.
Sipas tij, gjuha e përdorur në këtë rast është tejkaluar nga ana diplomatike.
“Gjuha e përdorur në këtë rast është e tejkaluar nga ana diplomatike në raport, sepse vetë këta zyrtarë e kanë pasur të qartë se do të realizohet një veprim i tillë, dhe nuk mund të mbahen kryetarët e komunave sado që të jenë legjitim, të fshehur ose të kamufluar nëpër zyre ose nëpër kioske dhe të mos shkojnë në objekte të tyre zyrtare”, shtoi ish-diplomati.
Avdia është shprehur se këtë situatë e sheh si një lojë futbolli, ku Kosova është në avantazh kundër Serbisë.
“Unë e shoh si një lojë futbolli e fortë, e cila ka filluar kur ne jemi 1-0 në avantazh, por loja ka më shumë se 90 minuta. Këta 90 minuta, për mendimin tim janë rreth 60 ditë. Në qoftë se shteti jonë, me kapacitet që i ka dhe me mbështetjen, me veprimet e saj e ruan status-quo e krijuar, dhe e ruan në mënyrë lidhore, juridike, profesionale siç e kanë bërë policët gjatë ditës së sotme. Pastaj, situata ndryshon dhe vetë aktori, i cili shkakton këtë dhunë dhe instrumentalizon këto grupe kriminale banditeske në veri, ai ka të pa mundshme për ta realizuar qëllimin e tij dhe në bisedime do të ketë një raund të shpejtë të dialogut. Jemi në avantazh në këtë moment”, shtoi ai.
Pas përshkallëzimit të situatës në veri, ShBA ka akuzuar Qeverinë e Kosovës për masa të dhunshme në veri. Sekretari amerikan i Shtetit, Antony Blinken, ka thënë se këto aksione të Qeverisë së Kosovës po përshkallëzojnë situatën në veri. Ndërsa, presidentja e vendit, Vjosa Osmani, ka deklaruar se veprimet e Policisë së Kosovës ndaj strukturave ilegale në veri janë legjitime. /teve1.info/
