Agjencia e Ushqimit dhe Veterinarisë (AUV) ka njoftuar për tërheqjen nga tregu të dy produkteve ushqimore për fëmijë të markës Aptamil, pas dyshimeve për praninë e substancës cereulide, e cila paraqet rrezik potencial për shëndetin.
Sipas AUV-së, informacioni është pranuar nga Republika e Shqipërisë, përkatësisht nga Autoriteti Kombëtar i Ushqimit, përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF), me numër reference 2026.0663.
Produktet në fjalë janë me origjinë nga Gjermania.
Autoritetet shqiptare kanë njoftuar se subjekti “Rossmann & LALA SH.P.K.” në Shqipëri ka eksportuar produktin APTAMIL 1 PRONUTRA 800 gr. ADVANC, loti 172911, me datë skadimi 10.11.2026, në Republikën e Kosovës për kompaninë Rossmann Kosova.
Po ashtu, pas inspektimit të depos së Rossmann Kosova, inspektorët kanë konstatuar se kompania ka nisur tërheqjen edhe të produktit APTAMIL PRE PROFUTURA DUO ADVA 800 gr., me numër artikulli 405663100.
Agjencia e Ushqimit dhe Veterinarisë ka bërë të ditur se, në bashkëpunim me kompaninë përkatëse, është duke u realizuar grumbullimi dhe bllokimi i këtyre produkteve, ndërsa së shpejti do të fillojë edhe procesi i asgjësimit, në përputhje me legjislacionin në fuqi.
AUV u bën thirrje qytetarëve që të mos i konsumojnë këto produkte dhe t’i kthejnë ato në pikat e shitjes ku janë blerë. /teve1.info/
