Agjencia e Ushqimit dhe Veterinarisë (AUV) ka vendosur ndalimin e përkohshëm të importit të të gjitha llojeve të qumështit të përpunuar për foshnje me markën “APTAMIL” në Kosovë.
Vendimi vjen pas njoftimeve të përsëritura nga Sistemi i Alarmimit të Shpejtë për Ushqim dhe Ushqim për Kafshë (RASFF), ku është raportuar për praninë e mundshme të toksinës Cereulide në këtë produkt në disa vende të Bashkimit Evropian, përfshirë edhe Kosovën.
Sipas AUV-së, qytetarët nuk duhet të shqetësohen, pasi për sasitë e importuara më herët janë ndërmarrë masa parandaluese në kohë.
“Qytetarët nuk kanë arsye për shqetësim, pasi për sasinë e futur më parë në Kosovë, masat janë ndërmarrë në kohë dhe në mënyrë parandaluese”, thuhet në komunikatën e Agjencisë.
AUV ka bërë të ditur se, në bashkëpunim me operatorët ekonomikë, është realizuar tërheqja nga tregu e produktit të paralajmëruar. Ndërkohë, inspektorët po vazhdojnë procesin e gjurmueshmërisë për të verifikuar nëse ka mbetur ndonjë njësi e produktit të konsideruar të papërdorshëm.
Sipas Agjencisë, të gjitha veprimet e ndërmarra kanë për qëllim mbrojtjen maksimale të shëndetit të foshnjave dhe konsumatorëve, ndërsa situata po menaxhohet në koordinim të vazhdueshëm me partnerët ndërkombëtarë.
Vendimi hyn në fuqi më 11 shkurt 2026 dhe është i detyrueshëm për të gjithë operatorët ekonomikë në territorin e Republikës së Kosovës.
AUV ka premtuar se do të informojë publikun për çdo zhvillim të mëtejshëm lidhur me këtë çështje.
