Agjencia e Ushqimit dhe Veterinarisë (AUV) ka marrë një masë të menjëhershme për ndalimin e importit të deleve dhe dhive nga dy qarqe të Shqipërisë – Shkodra dhe Kukësi – për shkak të shpërthimit të sëmundjes PPR (Peste des Petits Ruminants), e njohur ndryshe si murtaja e bagëtive të imta.
Sipas njoftimit zyrtar, ndalesa është vendosur pas konfirmimit të rasteve të sëmundjes në Qarkun e Shkodrës.
“Pas lajmërimit për konfirmim të shpërthimit të sëmundjes PPR (Peste des Petits Ruminants) tek kafshët e llojit të dhisë në Qarkun e Shkodrës në Republikën e Shqipërisë. Autoritetet kufitare do të shtojnë masat e kontrollit në të gjitha pikat kufitare me Shqipërinë, me qëllim parandalimin e futjes së kësaj sëmundjeje në territorin e Republikës së Kosovës.”
PPR, e njohur si murtaja e deleve, prek kryesisht ruminantët e vegjël si dhitë dhe delet. Sëmundja përhapet përmes kontaktit të drejtpërdrejtë me kafshë të infektuara, ndërsa burim i infeksionit janë sekrecionet dhe jashtëqitjet. Simptomat përfshijnë temperaturë të lartë, rrjedhje nazale, inflamacion të syve, ulje të oreksit, diarre dhe ngordhje.
AUV thekson se kjo sëmundje nuk është zoonotike, që do të thotë se nuk transmetohet te njerëzit dhe nuk paraqet rrezik për shëndetin publik.
Agjencia bën të ditur se, në bashkëpunim me autoritetet relevante, do ta ndjekë situatën me seriozitet të lartë dhe do të ndërmarrë masa parandaluese, duke informuar vazhdimisht fermerët dhe opinionin publik për çdo zhvillim të mëtejshëm.
