Stërvitjet më të mëdha ushtarake të zhvilluara ndonjëherë në Australi, të njohura si Ushtrimi Talisman Sabre, janë duke u mbajtur aktualisht dhe pritet të tërheqin vëmendjen e anijeve spiune kineze.
Talisman Sabre nisi në vitin 2005 si një stërvitje e përbashkët dyvjeçare mes Australisë dhe Shteteve të Bashkuara.
Këtë vit, më shumë se 35,000 trupa ushtarake nga 19 vende – përfshirë Kanadanë, Fixhin, Francën, Gjermaninë, Indinë, Indonezinë, Japoninë, Holandën, Zelandën e Re, Norvegjinë, Papua Guinenë e Re, Filipinet, Korenë e Jugut, Singaporin, Tajlandën, Tongën dhe Mbretërinë e Bashkuar – do të marrin pjesë në stërvitjen që do të zgjasë tre javë, bëri të ditur të dielën Departamenti i Mbrojtjes i Australisë.
Malajzia dhe Vietnami do të marrin pjesë si vëzhgues, sipas raportimit të Associated Press.
Për herë të parë, pjesë të stërvitjes po zhvillohen edhe në Papua Guinenë e Re, fqinji më i afërt i Australisë, duke shënuar herën e parë që Talisman Sabre organizohet jashtë territorit australian.
Ministri australian i Industrisë së Mbrojtjes, Pat Conroy, tha se anije kineze të mbikëqyrjes kanë ndjekur stërvitjet e mëparshme detare në brigjet australiane gjatë katër edicioneve të fundit të Talisman Sabre dhe pritet që kjo të ndodhë sërish këtë vit.
Kryeministri australian, Anthony Albanese deklaroi se mbikëqyrja kineze nuk do të jetë një çështje që do të ngrihet me presidentin Xi Jinping.
“Kjo nuk është diçka e pazakontë. Ka ndodhur edhe më parë, dhe unë do të vazhdoj të mbroj interesat kombëtare të Australisë, siç kam bërë gjithmonë,” u shpreh Albanese të hënën në Shangai.
Ai theksoi gjithashtu se, ndonëse ka vizituar pesë herë Shtetet e Bashkuara si kryeministër, ka qenë vetëm dy herë në Kinë.
Albanese është kritikuar brenda vendit për dështimin në sigurimin e një takimi ballë për ballë me presidentin amerikan, Donald Trump.
“Pres me padurim një bashkëpunim konstruktiv me Presidentin Trump. Deri tani kemi zhvilluar tre biseda telefonike shumë pozitive,” tha ai.
