Australia ka miratuar një legjislacion të ri që ndalon përdorimin e një sërë platformash të mediave sociale nga personat nën 16 vjeç, duke e bërë atë vendin e parë në botë që vendos një masë të tillë.
Ndalimi ka hyrë zyrtarisht në fuqi nga mesnata në Sydney, duke kufizuar aksesin e miliona fëmijëve në platformat më të përdorura online.
Sipas zyrës së statistikave të vendit, në Australi ka pesë milionë fëmijë nën moshën 16 vjeç dhe një milion të moshës 10–15 vjeç.
Për ta, legjislacioni i ri përcakton se nuk do të lejohen të kenë llogari në platforma të tilla si Facebook, Instagram, Snapchat, Threads, TikTok, X, YouTube, Reddit, si dhe platformat e transmetimit si Kick dhe Twitch.
Megjithatë, disa faqe dhe aplikacione të tjera do të mbeten të qasshme për të miturit. Platformat e fokusuara te fëmijët ose edukimi, si YouTube Kids dhe Google Classroom, si edhe aplikacione të mesazheve si WhatsApp, nuk përfshihen në ndalimin e ri.
Zbatimi i ligjit i është lënë vetë kompanive të mediave sociale, të cilat do të përballen me gjoba nëse nuk ndërmarrin “hapa të arsyeshëm” për të parandaluar aksesin e fëmijëve në faqet e tyre.
Qeveria australiane ka deklaruar se do ta mbajë listën e platformave nën shqyrtim, duke lënë të hapur mundësinë për zgjerim të mëtejshëm të ndalimit, raporton BBC.
Vendimi erdhi pas një studimi të porositur më herët këtë vit, i cili zbuloi se 96% e fëmijëve australianë të moshës 10–15 vjeç përdorin mediat sociale – dhe se shtatë nga dhjetë prej tyre janë ekspozuar ndaj përmbajtjeve të dëmshme, përfshirë materiale mizogjine, të dhunshme, dhe përmbajtje që promovon çrregullime të të ngrënit dhe vetëvrasje.
Ligji i ri synon të reduktojë këtë ekspozim dhe të ofrojë një nivel më të lartë mbrojtjeje për përdoruesit e rinj në mjedisin online.
