Viti 2024, e përballi Presidencën me më pak buxhet në dispozicion.
Ky institucion përgjatë vitit të kaluar pati 1.03 milionë euro buxhet, ku realizimi i tij ishte 100%.
Në të gjeturat e Zyrës së Auditorit, shpjegohet se cilat kategori kanë pësuar zvogëlim të buxhetit në bazë të një vendimi të Qeverisë.
“Buxheti përfundimtar është më i ulët se buxheti fillestar për 473 mijë e 796 euro. Ky zvogëlim është si rezultat i vendimit të qeverisë për kursime buxhetore, ku nga kategoria mallra dhe shërbime janë tërhequr 150 mijë euro, nga shpenzimet komunale 4 mijë euro, investimet kapitale 161 mijë euro, si dhe nga kategoria paga dhe mëditje 158 mijë e 792 euro”
Me zvogëlimin e buxhetit, Zyra e Presidencës nuk arriti të planifikojë mirë shpenzimet për një organizim të përvitshëm të saj.
Sipas të gjeturave të auditorit, Forumi Ndërkombëtar për Gratë, Paqen dhe Sigurinë i vitit 2024, tejkaloi vlerën e buxhetit që kishte në dispozicion.
“ZPRK kishte lidhur kontratë publike kornizë “Shërbime të transportit ajror- bileta”, për nevoja të Presidencës në vlerë prej 120 mijë euro. Gjatë auditimit kemi konstatuar se ZPRK kishte kryer furnizime në vlerë prej 211 mijë euro, duke tejkaluar vlerën e kontratës për 55 mijë euro. Kjo situatë ka ardhur si rezultat i organizimit jot ë duhur nga personat përgjegjës të përfshirë në organizimin jo të duhur nga personat përgjegjës të përfshirë në organizimin e dytë të forumit ndërkombëtar për Gratë, Paqen dhe Sigurinë, ku numri i pjesëmarrësve ishte shumë më i lartë ndërsa të gjitha planifikimet ishin bazuar në shpenzimet e edicionit të pare”.
Në mesin e gjetjeve të auditorit, është rendituar edhe mbajtja e pozitave me ushtrues detyre për një kohë më të gjatë se sa është e parashikuar ligjërisht.
“Në 15 raste, kemi vërejtur se pozitat e rregullta të punës mbaheshin me ushtrues detyre, më gjatë se afati i paraparë ligjor prej 12 muaj. Mbajtja e pozitave me ushtrues detyre për një kohë më të gjatë se afati i paraparë me ligj, rrezikon që pozitat e ndryshme të mbahen nga persona që nuk i përmbushin kriteret e kërkuara për pozitat adekuate”.
Si rekomandim i papërmbushur nga ana e Zyrës së Presidencës, është konsideruar mosfinalizimi i legjislacionit të brendshëm nga Sekretari i Përgjithshëm, që daton që nga viti 2023.
