Zyra Kombëtare e Auditimit (ZKA) ka publikuar raportin për projektin e ndërtimit të objektit të ri për klinikat e Nefrologjisë dhe Hemato-Onkologjisë në SHSKUK, në të cilin janë evidentuar një sërë mangësish në disa faza të procesit.
Sipas ZKA-së, auditimi ka zbuluar probleme në buxhetim, procedurat e tenderimit dhe menaxhimin e shpenzimeve.
Në dokument thuhet se janë vërejtur mospërputhje në planifikimin buxhetor të projektit, paqartësi dhe qasje të dyfishta gjatë hartimit të specifikimeve teknike, si dhe dallime mes dokumentacionit projektues dhe paramasës.
Gjithashtu, janë konstatuar mangësi në vlerësimin e ofertave dhe në administrimin e fondeve gjatë zbatimit të kontratës.
Auditorja e Përgjithshme, Vlora Spanca, ka theksuar se këto gjetje tregojnë për nevojën e një qasjeje më të strukturuar dhe respektimi të plotë të kornizës ligjore në realizimin e projekteve kapitale.
“Sjellja e standardeve më të larta në menaxhimin e fondeve publike rrit përgjegjshmërinë, transparencën dhe integritetin institucional”, ka deklaruar Spanca.
