Fasadimi i palestrës në fshatin Sllatinë e vogël nuk ishte bërë.
Por kjo nuk i kishte penguar Komunës së Fushë Kosovës që ta bëjë pagesën për furnizime dhe punë ende të papërfunduar.
Kështu komuna kishte paguar operatorin ekonomik afër 400 mijë euro për punën të cilën nuk e kishte kryer.
Kjo është një nga gjetjet e Zyrës Kombëtare të Auditimit për komunën e Fushë Kosovës.
E njëjtë kishte vepruar edhe në pesë kontrata të tjera, ku pagesa ishte kryer ndonëse puna nuk kishte nisur.
Kjo nuk është e vetmja parregullsi që ZKA ka evidentuar në këtë komunë.
Në dy raste të projekteve kapitale ishin nënshkruar kontrata me vlera më të mëdha se buxheti i paraparë.
“Projekti “Ndërtimi i Objektit të QMF-së, në Fushë Kosovë”, me ligjin e buxhetit të vitit 2024 përfshirë edhe projeksionet për vitet 2025 dhe 2026 ishin planifikuar 340,000€, derisa vlera e kontraktuar është 538,228€. Projekti “Instalimi – rregullimi i nxehjes në objektin e komunës”, me ligjin e buxhetit ishin planifikuar 50,000€ derisa vlera e kontraktuar është 81,111€. Pjesa e pambuluar e shpenzimeve është paguar nga buxheti i projekteve të bashkëfinancimeve, impianti i ujërave të zeza, dhe projektet nga donatorët dhe ministritë e linjës”, thuhet nga Zyra Kombëtare e Auditimit.
Poashtu sipas këtij raporti, në shtatë raste në vlerë totale afër 35 mijë euro, subvencionimi i OJQ-ve nuk ishte bërë në pajtim me Rregulloren dhe Thirrjet Publike.
Kurse në një rast, Komuna e Fushës Kosovës i kishte dhënë tendë një kompanie e cila nuk kishte përmbushur kriteret e përcaktuara me dosje të tenderit.
E këto të gjetura sipas degës së Lëvizjes Vetëvendosje në këtë qytet,kanë të bëjnë me keqmenaxhim dhe papërgjegjësi totale të qeverisje lokale.
“Raporti i auditimit për vitin 2024 e pasqyron gjendjen reale se qysh është aktualisht dhe qysh ka qenë viteve të kaluar kjo qeverisje. Në këtë raport e gjetur është se 900 mijë janë shpenzuar pa ndonjë mbulese pa ndonjë shpalosje adekuate, ka projekte që janë paguar pa u përfunduar punët dhe shohim se mbi 400 mijë euro të cilat janë humbur si rezultat i kamatave”, tha Durim Hajra.
Rrjeti i Organizatave joqeveritare (AVONET) thonë se këto të gjetura tregojnë se udhëheqësit e kësaj komunë kanë shkelur ligjin.
Madje sipas drejtorit ekzekutiv, këtu ka hapësirë edhe për nisje të hetimeve nga Prokuroria.
“Si mekanizëm kontrollues që është auditori e natyrisht duke parë të gjetura, një pjesë të tyre që të mos themi të gjitha, por pjesa dërmuese ka vlera dyshime për vepër penale. Dëmtimi i buxhetit, mosrespektimi i ligjit të prokurorimit edhe duke tejkaluar vlera e buxhetit e duke mos u kryer puna”, tha Kenan Gashi nga AVONET.
Tëvë1 ka provuar të marr një qëndrim edhe nga Komuna e Fushë Kosovës, por të njëjtit nuk kanë qenë të qasshëm.
