Administrata Tatimore e Kosovës ka njoftuar se ka suspenduar përkohësisht nga detyra dy zyrtarë tatimorë, ndaj të cilëve Prokuroria Themelore në Gjakovë ka ngritur aktakuzë për keqpërdorim të pozitës zyrtare dhe marrje të ryshfetit.
Sipas njoftimit të ATK-së, vendimi është marrë në përputhje me legjislacionin në fuqi dhe ka hyrë menjëherë në fuqi.
“Në përputhje me dispozitat ligjore që rregullojnë marrëdhënien e punës dhe statusin e zyrtarëve tatimorë, ATK ka marrë vendim për suspendimin e përkohshëm nga detyra të këtyre dy zyrtarëve, me efekt të menjëhershëm, deri në përfundimin e procedurës gjyqësore dhe marrjen e një vendimi përfundimtar”, thuhet në njoftim.
Administrata Tatimore thekson se vendimi është ndërmarrë pas aktakuzës së ngritur nga Prokuroria Themelore në Gjakovë, e cila i ngarkon dy zyrtarët me vepra penale që lidhen me keqpërdorimin e pozitës apo autoritetit zyrtar dhe marrjen e ryshfetit.
ATK ka ritheksuar se mbetet e përkushtuar ndaj luftimit të çdo forme të keqpërdorimit të detyrës zyrtare dhe ruajtjes së integritetit institucional.
“ATK nuk toleron asnjë formë të keqpërdorimit të detyrës zyrtare apo veprim që cenon integritetin institucional dhe do të vazhdojë të zbatojë me përpikëri dispozitat ligjore në çdo rast të tillë”, thuhet në reagimin e institucionit.
