Kjo është bërë e ditur përmes një njoftimi nga ATK, sipas të cilit thuhet se për katër muajt e parë të këtij viti janë inkasuar 269.4 milionë euro tatime, që në krahasim me vitin e kaluar ka rritje për 68.5 milionë euro ose 34.1 për qind.
“Trajektorja e lëvizjes së të hyrave të Administratës Tatimore të Kosovës nga rreth 42.9 milion euro që kishte tejkaluar të hyrat për tremuajt e parë, ka shënuar rritjen tjetër, ku vetëm për katër muajt e parë të këtij viti janë inkasuar 269.4 milion euro tatime, që në krahasim me vitin e kaluar kemi rritje për 68.5 milion euro apo 34.1%. Tejkalim të të hyrave ATK nuk ka vetëm në raport me vitin paraprak, por edhe në krahasim me planin, ku rritja e të hyrave në raport me planin ka shkuar në 39.5 milion euro apo 17.2%”, thuhet ndër tjerash në njoftim.
Tutje, ATK thekson se të gjitha këto statistika janë si reflektim i madh në zvogëlimin e hendekut tatimor sepse “çdo rritje e inkasimit nënkupton zvogëlim të hendekut tatimor”.
“Por, pavarësisht këtij trendi rritës të të hyrave, ATK është duke punuar fuqishëm në identifikimin e çdo rasti, i cili i shmanget obligimeve tatimore siç parashihet me legjislacionin tatimor. Kjo është duke u realizuar përmes projekteve të fundit, të cilat në fokus të trajtimit kanë të gjithë tatimpaguesit/bizneset të cilat sipas analizës së riskut kanë rezultuar si tatimpagues me risk të lartë për evazion fiskal, si në deklarimin dhe pagesën e tatimeve, në regjistrimin e punëtoreve si dhe mos-pajisje me arke fiskale dhe mos-lëshimin e kuponëve fiskal”, njofton ndër tjerash Administrata.
Po ashtu, në njoftim thuhet se në rritjen e të hyrave rol të madh ka luajtur edhe rritja e llogaridhënies dhe e përgjegjësisë te stafi sidhe rritja e inkasimit te mbledhja e borxheve.
“Në rritjen e të hyrave, gjithashtu rol të rëndësishëm ka luajtur rritja e llogaridhënies dhe e përgjegjësisë te stafi, rritja e inkasimit të mbledhja e borxheve, lehtësirat për tatimpaguesit në deklarimin dhe pagesën e tatimeve. Institucioni i ATK-së çdoherë e ka konsideruar si “inspektor” më të mirin qytetaret, të cilët përmes raportimeve për çdo parregullsi tatimore të hasur, kanë arritur që të krijojnë partneritet të fortë me ATK-në”,përfundon njoftimi i ATK-së./teve1.info/
