Administrata Tatimore e Kosovës (ATK) ka mbledhur 908.8 milionë euro të hyra tatimore nga janari deri në shtator të vitit 2026, duke shënuar rritje prej 14.4 për qind krahasuar me periudhën e njëjtë të vitit të kaluar.
Sipas njoftimit të ATK-së, të hyrat tatimore janë rritur për 114.5 milionë euro në raport me periudhën janar-shtator 2025.
Përveç rritjes së të hyrave, ATK ka bërë të ditur se gjatë kësaj periudhe është shënuar edhe rënie prej 22 për qind e numrit të ndëshkimeve.
Sipas këtij institucioni, këta tregues pasqyrojnë përmirësimin e përmbushjes së obligimeve tatimore, parandalimin e parregullsive dhe administrimin më efikas të detyrimeve nga tatimpaguesit.
ATK ka theksuar se rezultatet janë mbështetur nga monitorimi i vazhdueshëm i bizneseve, me fokus të veçantë te tatimpaguesit me rrezik të lartë tatimor.
Ndër masat e ndërmarra, institucioni ka veçuar edhe informimin dhe edukimin e tatimpaguesve, parandalimin e shkeljeve dhe digjitalizimin e shërbimeve tatimore.
Sipas ATK-së, këto masa synojnë të lehtësojnë përmbushjen e obligimeve tatimore, të rrisin përmbushjen vullnetare dhe të zvogëlojnë nevojën për masa ndëshkuese.
