Një ngjarje e rëndë kriminale ka ndodhur në rrethrrotullimin e Rinasit në Tiranë ditën e sotme, ku ka ndodhur një atentat me armë.
Sipas informacioneve nga vendngjarja, është qëlluar me armë zjarri në drejtim të një automjeti tip Mercedes-Benz S-Class ngjyrë e bardhë, duke shkaktuar 1 të vrarë dhe 1 të plagosur, të dy duke udhëtuar me të njëjtin mjet.
Viktimë ka mbetur Gilmando Dani rreth 40 vjeç, një personazh i njohur dhe me precedent të mëparshëm penal.
Sa i përket të plagosurit, ai është M.Sh. rreth 47 vjeç dhe ndodhet në spital në gjendje të rëndë shëndetësore.
Viktima Gilmando Dani dhe i plagosuri M.Sh. sapo ishin kthyer nga Barcelona drejt Tiranës.
Automjetin me të cilin po udhëtonin, një Mercedes-Benz S-Class ngjyrë e bardhë, e kishin lënë në parkingun e aeroportit.
Mjeti drejtohej nga M.Sh., i cili mbeti i plagosur rëndë gjatë atentatit dhe ndodhet në spital në gjendje kritike për jetën.
Gilmando Dani u ka shpëtuar edhe më parë dy atentateve, në vitet 2011 dhe 2015.
Të njëjtat burime bëjnë me dije se dyshohet që autori/ët kanë qëlluar me armë nga një makinë në lëvizje dhe më pas janë larguar në drejtim të Fushë-Krujës.
Mësohet se plumbat kanë prekur edhe një godinë hoteli në afërsi të vendngjarjes.
Ndërkohë, në fshatin Halil u gjet e djegur makina tip “Toyota”, që dyshohet se është përdorur nga autorët.
Në vendngjarje kanë shkuar forca të shumta policore dhe kanë krijuar një perimetër sigurie.
Në brendësi të mjetit janë gjetur katër armë zjarri, që dyshohet të jenë përdorur gjatë atentatit në Rinas.
Armët janë sekuestruar si prova materiale dhe do të dërgohen në Institutin e Policisë Shkencore për ekspertizë balistike, me qëllim përcaktimin e llojit të armëve dhe nëse janë përdorur në ngjarje të tjera kriminale.
Njëkohësisht kanë nisur hetimet për të identifikuar dhe kapur autorin/ët e atentatit, si dhe për të zbardhur motivet.
Sipas burimeve policore, në këtë atentat dyshohet të kenë qenë të përfshirë edhe persona të tjerë.
Këta të fundit, përmes dy makinave të tjera, dyshohet të kenë marrë pjesë në atentat gjithashtu, por do të jenë hetimet që do të zbardhin të gjithë dinamikën.
Ndërkohë grupi hetimor do të shqyrtojë pamjet e kamerave të sigurisë në zonë për të ndërtuar dinamikën e atentatit të rëndë./rtsh.al
