Kapiteni i Shqipërisë, Berat Gjimshiti i është shtuar listës së lojtarëve të lënduar te skuadra e Atalantas. Ekipi nga Serie A do të jetë të paktën disa javë pa Gjimshitin, i cili u dëmtua në ndeshjen e fundit kampionale, ka shkruar “Sky Sport Italia”.
Gjimshiti lëndoi muskulin e këmbës së majtë dhe u largua në minutën e 19-të në ndeshjen kundër Torinos, të cilën Atalanta e humbi me rezultatin 3:0.
Për rikthimin e Gjimshitit nuk është dhënë një datë e saktë, por thuhet se ai pritet të jetë në dispozicion të trajnerit Gian Piero Gasperini pas pushimit të Vitit të Ri, pra në fillim të muajit janar.
Mbrojtësi 30-vjeçar, këtë edicion ka regjistruar 18 paraqitje për Atalantan në të gjitha garat, ndërsa ka shënuar edhe një gol.
