Bëhet fjalë për dy organizata jo qeveritare, Fondacionin Gjerman Friedrich Ebert Stiftung dhe Institutin Evropian për Paqe, të cilat thuhet se janë ngarkuar me këtë mision, për hartimin e statutit të Asociacionit të komunave me shumicë serbe.
Të përfshira në skenar sipas gazetës, janë edhe Milica Andrić Rakiq dhe Jovana Radosavljeviq. Të dyja këto angazhohen në Mitrovicën e Veriut, si pjesë e shoqërisë civile.
Megjithatë televizioni nga burimet e veta ka kuptuar, se ato nuk janë pjesë e ekipit për hartimin e asociacionit.
Derisa Fondacion gjerman, Friedrich Ebert Stiftung, në një përgjigje me shkrim për tëvë1, i ka quajtur si të pavërteta këto pretendime.
“Nuk ka absolutisht asnjë bazë për pretendimin se dy organizatat tona kanë marrë një kërkesë apo mandat nga emisari për dialog Miroslav Lajçak, qeveria gjermane apo ndonjë palë tjetër për të zhvilluar një statut për Asociacionin/Bashkësinë e komunave me shumicë serbe”, tha René Schlee, përfaqësues Rezident për Kosovën – FES.
Televizioni, lidhur me këtë çështje e ka pyetur edhe Bashkimin Evropian, por këta të fundit kanë qëndruar të heshtur.
Një gjë të tillë e ka mohuar, edhe numri dy i Qeverisë, Besnik Bislimi.
Serbia po vazhdon të insistojë në krijimin e asociacionit me kompetenca ekzekutive, derisa nga ekzekutivi kosovar e kanë përjashtuar mundësinë që asociacioni të krijohet në atë formë. Se ky asociacion duhet të jetë në përputhje me Kushtetutën e Kosovës e ka thënë edhe emisari i SHBA-së, Gabriel Escobar.
Kronika e gazetarit Shpat Blakçori.
