Asociacioni i Gazetarëve të Shqipërisë i ka bërë thirrje Policisë së Shtetit që të ndalojë menjëherë sulmet ndaj mediave dhe gazetarëve, pas raportimeve për incidente gjatë protestës që po zhvillohet para Ministrisë së Brendshme.
Sipas raportimeve paraprake, gazetarja e Fax News, Fatime Halmusa, është dëmtuar fizikisht nga Policia e Shtetit, ndërsa ekipi i A2 CNN është penguar forcërisht të raportojë nga vendngjarja.
Probleme gjatë raportimit kanë raportuar edhe media të tjera.
AGSH e cilëson të papranueshme çdo formë dhune apo pengese ndaj gazetarëve në ushtrimin e detyrës dhe kërkon që rastet e raportuara të trajtohen me urgjencë nga Agjencia e Mbikëqyrjes Policore dhe Prokuroria.
