Ish-kryeministri, Isa Mustafa ka deklaruar se në bazë të vendimit të Gjykatës Kushtetuese, Asociacioni i komunave me shumicë serbe do të krijohet në bazë të marrëveshjes së vitit 2013.
“Gjykata Kushtetuese ka qenë e qartë, ajo thotë që asociacioni duhet të themelohet sipas marrëveshjes së parë të vitit 2013, dhe jo sipas marrëveshjes së vitit 2015. Unë mendoj që ashtu duhet të vazhdohet… Në qoftë se bëhet, bëhet sipas marrëveshjes së vitit 2013, marrëveshja është mjaft e përgjithshme sepse marrëveshja ka thënë se ma vonë duhet të përcaktohen parimet, ne në këtë marrëveshjen e vitit 2015 kemi punuar në parime jo në marrëveshje për themelim sepse, marrëveshja për themelim ka qenë e vitit 2013, ndërkaq ne kemi punuar në parime. Parimet kanë qenë si një dokument i ndërmjet, ndërmjet marrëveshjes dhe statusit i cili do të pasonte si dokument i asociacionit. Gjykata ka thënë se disa nga pikat e marrëveshjes nuk janë në harmoni me frymën e kushtetutës dhe ka gjykuar që duhet të bëhet në bazë të marrëveshjes së vitit 2013”, ka deklaruar Mustafa në Tëvë1.
Pika 2 e marrëveshjes së Brukselit të vitit 2013, ndër të tjera thotë se Bashkësia/Asociacioni do të themelohen përmes statutit.
Njohësi i çështjeve juridike, Anton Nrecaj thotë se pikërisht në këtë pikë ka insistuar edhe vendimi i Kushtetueses.
“Kemi aktgjykimin e Gjykatës Kushtetuese. Sipas këtij aktgjykimi natyrisht që themelimi i këtij asociacioni fillimisht duhet të iniciohet, hartohet statuti i asociacionit të komunave serbe dhe i njëjti të dërgohet në Gjykatë Kushtetuese për interpretim ligjor në mënyrë që të vërtetohet që ai statut a bije ndesh akoma hartimi i atij statusi të evitohen ajo pjesa e shkeljes së kushtetutshmërisë së statutit”, ka theksuar Nrecaj.
Ndonëse vendimi i kushtetueses e ka qartësuar çështjen, analisti politik, Artan Muhaxhiri, thotë se me këtë qeveri nuk mund të themelohet asociacioni.
“Unë mendoj që me këtë qeveri nuk ka asnjë gjasë që të krijohet asociacioni, sepse edhe kryeministri Kurti edhe kabineti i tij qeveritar janë 100% kundër themelimit të asociacionit dhe as që dëshirojnë të diskutojnë për këtë pra çdo tentim duket i kot edhe asociacioni mund të krijohet vetëm nëse ndryshohet edhe qeverisja në Kosovë”, ka deklaruar Muhaxhiri
Në marrëveshjen e vitit 2015 për bashkësinë e komunave serbe është punuar për parimet që rrjedhin nga marrëveshja e vitit 2013.
Raporti i gazetarit Valmir Gallopeni.
