Të gjitha përgatitjet e nevojshme për fillimin e procesit të votimit janë kyer në qendrën e Veli Bregut të Zubin Potokut.
Kështu ka thënë për teve1.info kryetari i këshillit të vendvotimit, Ferit Shabani.
“Sa i përket përgatitjeve të nevojshme për fillimin e procesit të votimit, gjithçka ka arritur me kohë dhe qendra e votimit është e gatshme dhe presim që 4111 votues ta shfrytëzojnë këtë të drejtë vote”.
Ai ka shtuar se për një orë nuk ka dalë asnjë qytetar në votime.
“Deri në këto momente nuk kemi asnjë votues që ka dalë për të votuar qoftë në mënyrë të rregullt apo me kusht”.
“Në këtë qendër të votimit, përbërja e këshillit të vendvotimit është prej tre personave, kryesuesit dhe dy personave të tjerë shqiptarë”, ka shtuar Shabani.
Sipas gazetares së Tëvë 1, Fetije Kamberi, aty ka patrulla të policisë e KFOR-it.
“Janë dy patrulla të Policisë së Kosovës afër, disa patrulla janë një lëvizje. Një është pak metra larg kësaj qendre të votimit. Kemi pa edhe patrulla të KFOR-it”, ka thënë ajo
Teksa, gazetarja Fetije Kamberi ka vizituar edhe qendrën e votimit në shkollën e fshatit Çabër, fshatin me shumicë shqiptare, teksa ka thënë se atje ka pasur interesim për të votuar, në kohën kur ajo ishte atje.
“Në ora 07:00 të mëngjesit ishim në fshatin Çabër, kemi parë që për 20 minuta atje kanë qenë 6 persona që iu kanë afruar qendrave të votimit dhe kanë votuar për kryetar të komunës së Zubin Potokut. Drejtori i shkollës ka thënë se i kanë marrë me kohë të gjitha materialet zgjedhore dhe ishte gjithçka në rregull. Edhe atje kishte patrulla të policisë dhe KFOR-it”, ka deklaruar ajo.
Në Zubin Potok janë 6 mijë e 661 qytetarë me të drejtë vote e kandidatë janë Izmir Zeqiri nga PDK dhe Flatron Hasani, LVV.
