Katër vjet më parë u qëllua për vdekje politikani serb, Olivier Ivanoviq.
Dyshimet e familjarëve janë se vrasja u bë me motive politike.
E autorët e këtij krimi ende nuk janë sjellë para drejtësisë.
Djali tij, Nikola Ivanoviq, jeton në Beograd, por ai vjen shpesh për vizitë në selinë e partisë ku punonte babai tij.
Në lagje, ai pritet mirë nga fqinjët, madje ata kanë gjithmonë diçka për t’i thënë.
Ivanoviq për Tëvë1 rrëfen detaje interesante për babin e tij.
Ai thotë se nuk kishte dijeni që babai ishte i cak i krimineleve.
“Të them të drejtën nuk e kam pritur një gjë të tillë, jam akoma i shokuar me atë se çfarë i ndodhi babait tim. Momentin kur ndodhi vrasja unë isha në Beograd. Unë kam folur me të për çështje të ndryshme, ai nuk shprehte ndonjë shqetësim. Ai kujdesej që temat politike ti mbante larg familjes, ai asnjëherë nuk na ka shqetësuar”, thotë ai.
Ivanoviq tregon se babai i tij ndryshoi shumë sa qëndroi në burg dhe se kur doli nga aty ai e kuptoi se gjendja në terren kishte ndryshuar.
Ai foli edhe për Listën Serbe ku tregoi se Olivier Ivanoviq ishte kundërshtar i tyre, sepse luftonte për një mjedis më të lirë për serbët e Kosovës.
“Normalisht që ai ishte kundërshtar i Listës Serbe, sepse donte më shumë liri për serbet që jetojnë në Kosovë. Ai nuk ishte kurrë anëtar i kësaj partie. Lista Serbe nuk është e lirë dhe bën presione mbi serbët. Por ajo çka e ndryshoi më shumë jetën e tij ishte qëndrimi në burg. Ai qëndroi 4 vite i izoluar dhe u ballafaqua me presione të ndryshme. Kur doli nga burgu, babi im e pa që gjendja ne terren kishte ndryshuar shumë”, shtoi ai.
Ivanoviq shpreson që të drejtësia të vij në vend sa më shpejt, por deri më tani shprehet i zhgënjyer me punën organeve të drejtësisë.
Oliver Ivanoviq ishte në pritje të rigjykimit nën akuzat për krime lufte, pasi thuhet se ka urdhëruar vrasjen e shqiptarëve në Mitrovicë gjatë luftës në Kosovë në vitin 1998-99.
Kronika e realizuar nga gazetari Shpat Blakçori.
