Të premten ka përfunduar procesi i konvertimit të patentë shoferëve ilegal të lëshuar nga Serbia, në ata të Kosovës. Nga Ministria e Punëve të Brendshme në një përgjigje për Tëvë1, kanë bërë të ditur se numri total i qytetarëve që kanë aplikuar për konvertim të patentë shoferëve është mbi 6 mijë e 500. Ndërsa të hënën në veri, policia e Kosovës u pa duke kontrolluar shoferët, ndërsa nuk hasi të tillë më leje ilegale të ngasjes.
Gjatë së hënës, Policia e Kosovës realizoi kontrolle në veri.
Njësitë e policisë, fokusin e kishin sa i përket patentë shoferëve.
Kjo pasi të premten ka përfunduar procesi i konvertimit të patentë shoferëve ilegal të lëshuar nga Serbia, në ata të Kosovës.
E për këtë proces, aplikuan jo pak serbë të veriut.
Dënimi për ata që nuk i kthyen patentë shoferët në të Kosovës, shkon deri në 1 mijë e 500 euro.
Por, zyrtarët policorë të hënën nuk hasën në të tillë, pasi bën të ditur se nuk u shqiptua asnjë tiketë.
E krejt këtë proces, njohësit e politikes po e shohin si rast të mirë për integrim të komunitetit serb.
“Ndikon dukshëm, më shumë se në integrimin e serbëve në shoqërinë kosovare, ndikon në vendosjen e rregullit, rendit e ligjit dhe idesë që Kosova është një dhe e pandashme”, tha profesori universitar, Nexhmedin Spahiu.
Të njëjtin mendim, e kanë edhe politikanët nga veriu.
“Kjo është një shenjë e mirë që jemi afër normalizimit, me targa të RKS-së, me patentë shoferë, edhe pse dalin edhe disa telashe të tjera, por definitivisht jemi shumë afër të merremi me çështje normale”, tha zëvendëskryesuesi në Kuvendin Komunal, Skëndër Sadiku.
Ndryshe, nga e hëna në Kosovë, shoferët nuk do mund të vozitin me leje nga Serbia.
Shoferëve me leje ilegale, u ishte dhënë një afat prej tre muaj e gjysmë për konvertimin e tyre në patentë shoferë të Kosovës. /teve1.info/
