Mesfushori i Shqipërisë, Kristjan Asllani, të hënën mbrëma u transferua te Torino dhe një ditë më vonë, postoi një mesazh për skuadrën e Interit.
Asllani u huazua për një vit te Torino për 1.5 milionë euro, ndërsa ekipi ka opsionin e blerjes së tij vitin tjetër për 12 milionë euro.
Pasi kompletoi kalimin te Torino, Asllani me një mesazh i është drejtuar tifozëve të Interit.
23-vjeçari luajti tre sezone për Interin duke fituar një titull kampioni, një kupë dhe dy Superkupa të Italisë.
“Tifozë të dashur zikaltër, Ka ardhur momenti të përshëndetemi, dhe besomëni, nuk është e lehtë të gjej fjalët e duhura. Të vesh fanellën e Interit ka qenë një ëndërr që e kam ruajtur që fëmijë, kur mbështesja këto ngjyra me sy plot admirim. Sa herë që kam zbritur në fushën e “San Siro”, kam ndier krenarinë dhe përgjegjësinë për të përfaqësuar një skuadër që do të mbetet përgjithmonë pjesë e imja. Falënderoj Interin që më dha mundësinë ta realizoj këtë ëndërr”, ka shkruar Asllani.
“Një falënderim i veçantë për shokët e mi të skuadrës, që nuk kanë qenë vetëm ekip, por një familje e vërtetë, dhe për gjithë stafin që më ka shoqëruar gjatë këtij rrugëtimi. Gjithmonë jam përpjekur ta nderoj këtë fanellë me përkushtim, sakrificë dhe respekt. Të gjithëve atyre që më kanë mbështetur, u shpreh mirënjohjen time të thellë. Po largohem nga Milano, por Interi do të mbetet gjithmonë në zemrën time, sepse kur i dashuron këto ngjyra që fëmijë, nuk pushon kurrë së mbajturi me vete”.
Asllani pritet këtë vikend të debutojë te skuadra e Torinos, pjesë e së cilës është edhe Ardian Ismajli.
