Presidenti Donald Trump nuk ka treguar nëse ka vendosur të urdhërojë një sulm të ShBA-së ndaj Iranit, një veprim për të cilin Teherani paralajmëroi përsëri se do të përballet me hakmarrje të ashpër nëse ndodh.
“Mund ta bëj, mund të mos e bëj. Dua të them, askush nuk e di çfarë do të bëj”, u tha Trump gazetarëve kur u pyet nëse kishte vendosur t’i fillonte bombardimet kundër Iranit, raporton AP.
Trump tha se Irani madje kishte lënë të kuptohet se dëshiron të dërgojë zyrtarë të vet në Shtëpinë e Bardhë për të biseduar mbi programin bërthamor të Teheranit dhe për t’i ndalur sulmet ajrore të Izraelit, por shtoi se “është shumë vonë”.
“Asgjë nuk është e përfunduar derisa të përfundojë”, shtoi Trump. “Por java e ardhshme do të jetë shumë e rëndësishme – ndoshta më pak se një javë”.
Trump ofroi gjithashtu një përgjigje të prerë ndaj refuzimit të Udhëheqësit Suprem të Iranit, Ajatollah Ali Khamenei, për t’iu bindur thirrjes së tij që Irani të dorëzohej pa kushte.
“Është shumë e thjeshtë – dorëzim i pakushtëzuar. Kjo do të thotë që unë e kam humbur durimin, në rregull? Mjaft më, dorëzohem, s’ka më, shkojmë dhe i shkatërrojmë të gjitha gjërat bërthamore që janë përreth”, tha Trump.
Trump i bëri këto komente disa orë pasi lideri suprem i Iranit, ajatollah Ali Khamenei, i hodhi poshtë thirrjet për t’u dorëzuar përballë bombardimeve nga Izraeli dhe paralajmëroi se SHBA-ja do të pësojë “dëme të pariparueshme” nëse përfshihet ushtarakisht.
