Ushtruesi i detyrës së drejtorit ekzekutiv të Agjencisë së Statistikave të Kosovës , Avni Kastrati, ka thënë se ka gatishmëri për regjistrim të popullsisë edhe në pjesën veriore, pavarësisht thirrjes së Listës Serbe për bojkot.
Kastrati në një konferencë për media të mbajtur të hënën, ku ka folur për ecurinë e procesit që ka filluar të premten, ka thënë se kanë takuar përfaqësues të banorëve dhe se kanë gatishmëri, por që është kërkuar disa ditë afat shtesë për trajnim.
“Jemi takuar me përfaqësues të komunitet serb po me me Listën Serbe dhe ka një gatishmëri edhe te popullsia serbe për me u regjistrua edhe tek ata ka një gatishmëri dhe kanë kërkuar disa ditë afat për mu trajnu dhe ne jemi dakord. Presim që në ditën në vijim t’i grumbullojmë të dhënat edhe në atë pjesë”, ka thënë ai përcjell teve1.info
Po ashtu, Kastrati ka njoftuar se procesi po monitorohet nga ndërkombëtarët, ku pas dy javës do të vijë një komision i monitorimit nga UNESCO.
“Gjitha komunitete janë duke marrë pjesë në regjistrim, pa anashkaluar asnjë komunitet. Kemi edhe institucione ndërkombëtare që do ta monitorojnë procesin e regjistrimit i kemi disa kolegë këtu që janë nga disa shtete. Pas dy javësh do të vijë një komision i monitorimit nga UNESCO, i përbërë nga ekspertë të ndryshëm. Procesi po shkon sipas planit që kemi planifikuar”, u shpreh ai.
Ndërkohë, ai ka pohuar se regjistrimi po shkon sipas planit të paraparë, dhe funksionalizmi i sistemit si sfidë tashmë është tejkaluar.
“Është shumë me rëndësi të dimë se gjitha aktivitete që janë paraparë deri para regjistrimin janë kryer dhe kemi hyr në një fazë të grumbullimit të të dhënave në terren. Pajisjet janë adekuate dhe shumë funksionale, e kemi kaluar një pengesë teknike. Sistemi është duke funksionuar meqenëse ka qenë sfidë. I gjithë sistemi nuk ka pasur asnjë telash. Është zhvilluar edhe sistemi i procesit të monitorimit. Aktivitetet e parapara janë në linjë me planin që kemi pasur”, shtoi ai.
Më 5 prill, Lista Serbe, partia më e madhe e serbëve në Kosovë e cila gëzon mbështetjen e Beogradit zyrtar ka thënë se serbët e Kosovës nuk do të marrin pjesë në regjistrimin e popullsisë.
Lista Serbe ka thënë se pjesëmarrja në “proceset e organizuara nga [kryeministri i Kosovës, Albin] Kurti do të ishte poshtërimi më i madh për popullin tonë, në kohën kur i njëjti ua mohoi serbëve të drejtën për pensione dhe paga, pengoi funksionimin normal të shëndetësisë dhe përfitimeve sociale, hoqi të drejtën e votës, arrestoi dhe persekutoi serbët, i pushtoi komunat me forcë, militarizoi veriun e Kosovës…”.
Procesi ka nisur më 5 prill dhe do të zgjasë deri më 17 maj.
